Ka Elaka Nongjngi Sports Club, ka pyntip paidbah ba kan pynlong ia ka jingialehkai phutbol bad kaba la tip kum ka 1st Tournament Football ia kaba kin sa pynialehkai ha ar-tylli ki madan, kata ha madan Jrikhla (Ionglwit) bad ha madan Sari Namdong-B.
Kumta na ka liang ki nongpyniaid ka Elaka Nongjngi, ka khot bad wer ia baroh ki kynhun ialehkai kiba hap hapoh jong ka Elaka naduh ki Shnong, ki Sport Club bad ia ki Balang ba kin iashimbynta ha katei ka lympung bad ka ban sa sdang shen.
Ki nongpyniaid jong katei ka Elaka Nongjngi, ki ong ba ka jingthum jong katei ka lympung ialehkai, ka long ban sei madan ia ka sap ka phong ha ki kam ialehkai phutbol jong ki khun samla kiba don hapoh katei ka Elaka.
Ki la pyntip ruh ba ka bai rung kan long 2 hajar tyngka kawei kynhun bad ka tarik ba khatduh ban pdiang ia ki kynhun kiba kwah ban iakhun ha katei ka lympung kan long haduh ka 09.07.2024. Ki khusnam kin long ba ka kynhun kaba long kum ka nongjop, kan ioh ia ka song pisa kaba T. 1 lak bad T. 60 hajar ia ka kynhun kaba shah rem ha ka phainal, nalorkata kin don ruh kiwei pat ki khusnam.
