Nongpoh, Nailar 31: Ki nongñiah bad ki trai trok kiba ju kamai haka jylla bad shabar, hapoh ka lama ka Meghalaya Commercial Truck Owners and Drivers Association (MCTODA) mynta ka sngi kila leit ban ïakynduh syndon ïaki bor district ka Ri-Bhoi ban ïakren halor ka jingeh ba ju mad da ki nongñiah trok naka por sha ka por, khamtam hadien ba ki rung sha ka District Ri-Bhoi kaba dei ka jaka rung bad jaka mih jong ka jylla.
Kawei naki jingeh kaba hakhmat ruh kaba ki nongñiah trok mynta ki mad ka dei jaka ieng bad ka jaka shongthaid jong ki nongñiah trok hadien ba ki bor district ka Ri-Bhoi dang shen kila pynmih ïaka hukum ban khanglad ïaki trok ban ieng haki rud surok ha shilynter ka surok bah ha Ri-Bhoi District, ban lait naki jingjia aksiden bad ruh ka jingduh noh ki mynsiem briew.
Naka liang ka kynhun MCTODA, mynta ka sngi ka thmu ban leit kynduh ïa u Deputy commissioner ka Ri-Bhi naka bynta ban ïakren ïa katei ka kam hynrei namar ka jingbym don jong u, naka liang ka kynhun kala leit ban ïakynduh noh ïa ka kong Balakyntiew Ranee kaba dei ka Additional Deputy Commissioner ban aiti ruh da ka jingthoh hadien bun ki jingujor naki nongñiah trok bad kumjuh ruh hadien ka jingwad bñiah jong ka kynhun.
Ha kane ka sngi ha ka jingialam u Chairman ka MCTODA u Bah Mosklandar Marngar bad u General Secretary u Bah Peter Marbanaing k la leit ruh ban ia kynduh ia u Superintendent of Police ka Ri Bhoi ban kyrpad lem ia u ban pyrkhat lem iaki Driver Truck kiba shim jingeh ha kane ka surokbah National Highway-6 ha Ri Bhoi District.
Kane ka jingleit kynduh kane ka seng ia u DC bad SP ka Ri Bhoi, ka dei ruh hadien ba ki bor sysnhar district ki la pynmmih hukum ban nym shah ieng klumar ki Trok harud kane ka surokbah kumba la wan ka jingbtah naduh ka Supreme Court kaba long na ka bynta ka jingshngain ki paidbah ha ka leit ka wan, hynrei ka jingbym don pat ka jaka ieng kali (Parking lane) lane ki layby lane ka la buh jingeh ia ki dirbar truck ba teng teng ka wan rah wat ia ka jingjia ba sngewsih ia ki.
Peit ruh:
Kumba la pynpaw ha katei ka jingthoh, ka phang kaba hakhmat eh ka long ban dawa ban ai jaka ia ki Driver Trok ba kin ieng ia ki Trok ha kane ka surokbah, namar naduh ba la pynmih hukum ban nym shah ieng ia ki trok ka la wan rah jingeh ia ki Driver Trok bad lyngba kane ka hukum ka la mih ruh ki jingjia ba sngewsih ha kaba ki Driver Trok ki mad jingeh shisha ba ka NHAI ne ka sorkar kam shym la ai jaka ia ki ban ieng ia ki Trok haba ki poi ha kane ka surokbah kaba ki donkam ban pynjahthaid ne ka jaka ieng haba kim ioh ban iaid lada don ka No Entry ban iaid.
