Ka seng Ri Bhoi Peoples’ Council (RBPC) mynta ka sngi ka la leit ban ia kynduh ia u Deputy Commissioner ka Ri Bhoi, u Abhilash Baranwal ha ka ophis treikam jong u ha Nongpoh bad ha kajuh ka por ka seng ka la aiti ruh ia ka dorkhas kaba ka la dawa ba dei ban kham phai khmat kyrpang ia ka thung kam ka thung jam ia ki samla trai district ha ki post DSC bapher bapher ha Ri Bhoi District.
Ha kane ka jingleit kynduh ia u Deputy Commissioner la ialam da u Samla Jayson Lennox Nongrum kum u President bad la synranlang ruh da ka jingdon lang u Samla Mission Tron Vice President, Vincent Sohkwai General Secretary, Eldrian Lyngdoh Assistant Secretary lem bad kiwei kiwei ki dkhot ka seng.
Haba ia kren bad ki nongthoh khubor, u samla Jayson Lennox Nongrum, President ka RBPC, u la ong ba ka daw kaba la pynlong ia ka seng ban leit kynduh ia u Deputy Commissioner ka Ri Bhoi, ka dei halor ka Nongrim ba ka seng ka angnud ba ka jingthungkam thungjam ha ki post DSC bapher bapher, ki bor synshar District ki dei ban phaikhmat shwa ia ki samla trai District.
U la ong ruh kumba long ha East Khasi Hills, la pynpaw shai kdar ha ka Advertisement ba ia ki post DSC kin kham phai khmat shuwa ia ki samla trai district bad kumba long ha East Khasi Hills ka jingthungkam ia ki post DSC ka dei ban long lang kumjuh wat ha Ri Bhoi District.
U la pynpaw ruh ba kane ka jingiakynduh ia u Deputy Commissioner ka Ri Bhoi, ka la long ka jingiakynduh kaba seisoh, namar na ka liang u Deputy Commissioner ka Ri Bhoi u la kular ban wad bniah ne shim khia halor kine ki mat ba la wan rah da ka seng RBPC.
Shuh shuh, u la bynrap ruh da kaba ong, ka seng RBPC ka la dawa ruh na u Deputy Commissioner ka Ri Bhoi ba dei ban pynmih biang ia ka Advertisement jong ki post ba laitkam ha ki tnad sorkar bapher bapher ka Ri Bhoi bad dei ruh ban kdew shai ba ia ka jingthungkam kan kham long kyrpang shwa ia ki samla trai district kumba la pynpaw ha ka Advertisement ka East Khasi Hills, u la bynrap.
