Da ka jingshim khia u MLA bad ki nongialam kan long shisha ka jingkmen bad ka jingkyrkhu ia ki paidbah ka Mawhati Constituency, ha kaba mynta ka sngi u Myntri rangbah ka jylla Meghalaya u la kular ba shen un sa pynbna noh ban ai ia ka jingdawa ban buh ia ka C&RD Block ha Mawhati.
Kane ka jingkular u myntri rangbah ban pynbna halor katei ka C&RD Block, ka dei hadien ba mynta ka sngi, na ka liang u MLA ka Mawhati, u Bah Charles Marngar lem bad kiwei ki nongialam, ki la leit ban ia kynduh kyrpang ia u myntri rangbah ka jyla, u Conrad K. Sangma ha ka ïingsah jongu ha Nongbah Shillong.
Kumba la pynpaw da u MLA ka Mawhati u Bah Charles Marngar, u la iathuh ba ki mat ba kongsan ba la pynsngew sha u myntri rangbah ka jylla, u Conrad K. Sangma ha kane ka jingiakynduh ki kynthup naduh ka jingdawa ban pynurlong ia ka C&RD Block ha Mawhati, ka surok (Intermediate road) na Sohnidan sha Umsiang, ban kyntiew kyrdan ia ka Mawrong bad Sohnidan Sub Cenrte sha ka PHC, bad kiwei ki surok ba dang sahteng hapoh Mawhati Constituency.
Na ka liang u MLA ka Mawhati, u Bah Charles Marngar, hadien ka jingiakynduh ia u myntri rangbah, u la ai khublei kyrpang ia u myntri rangbah khamtam ka jingkular ban pynbna noh shen ban ai ia ka C&RD Block ha Mawhati, ka jingmang pisa na ka bynta ka surok na Sohnidan sha Umsiang bad kynthup kiwei kiwei ki kam pynroi kum ki skul ha khappud Block II.
Ha kaba ia dei bad kiwei ki bynta, u Bah Charles Marngar u la iathuh ruh ba la dep ban pynsngew hakhmat u myntri rangbah ban don noh ki skul sorkar ha khappud Block II ha kaba haduh 7 tylli ki shnong kim pat don ia ka skul kaba bit babiang, kata ki sruok ha ka list jong ka PMGSY, Phase III ka surok Mawrong 17 km, ka surok Pamlatar 8 km, ka surok sha Lymphuid 16 km, bad u surok na Mawlasnai sha Kdohhati 20km.
Shuh shuh, na ka liang u MLA ka Mawhati u Bah Charles Marngar u la pynpaw ia ka jingkmen halor ki dak ki shin ba la kular da u myntri rangbah bad u kyrmen skhem ruh ba u myntri rangbah ka jylla kumba u la kular un sa pynurlong noh ia ka jingangnud ki paidbah ka Mawhati Constituency kaba dei kawei na ka Constituency kaba dang sahdien ha ka liang ki kam pynroi, u la bynrap.
