Ka Khasi Students Union (KSU) ha ka sngi Saitjain ka la kyrpad jur sha baroh ki 13000 ngut ki samla ba iakhun iaka MCS (Prelims) examination ban ia snoh kti lang bad ka KSU na ka bynta ban pynduhjaid ia ki kam leh thok ha MPSC ha kaba ia dei bad ka thungkam ka thungjam bad ba ka seng ka la dawa ruh ban pynlait paidbah ia ki Marks jong ki samla ba ia khun ia katei ka examination wad kam.
Kane ka jingkyrpad ka KSU ia ki samla wad kam ha MPSC, ka dei hadien ba ka MPSC ka la rai ban nym pynlaiti paidbah ia ki Mark jong ki samla ba ia khun ia ka MCS Preliminary examination, kaba dei ruh hadien ba la don katto katne ki samla kiba la pyrshah jur ban pynlait paidbah ia ki Marks.
Halor kane ka phang, kumba la pynpaw da u Secretary ka MPSC ha ka jingpyntip paidbah (Public Notice), la pyntip ba ka jingthmu ban pynlait paidbah ia ki Marks jong ka MCS preliminary examination ka dei kaba la pyrshah jur da ki katto katne ki samla ba iakhun ia kane ka MSC examination bad kaba ktah ruh ia ka hok long kyrpang (Right to privacy) kaba la pynkup bor ruh katkum ka Article 21 jong ka riti synshar ka ri India.
Ia kane ka jingpynbna paidbah la pynmih ruh hadien ba ka KSU ka la pynlong ia ka jingiakhih shongkyllain mongor ban pyrshah ia ki jingleh bymhok ha ka jingpynrung kam bad dawa ruh ban pynpaw ia ki marks jong baroh ki kyrtong ba ia khun ia ka MCS Examination.
Ka KSU ka la kyntu jur ruh ia ki 13000 ki samla ba iakhun ha ka MCS preliminary examination ban wan shakhmat bad ban iatrei lang na ka bynta ban pynduhjaid ia kino kino ki kam leh thok ha MPSC bad da kaba kum ki samla kin ai jingthoh ruh sha u Chairman ka Commission ba kim don kano kano ka jingpyrshah na ka bynta ban pynlait paidbah ia ki Marks. Lada kum ki samla kim ioh snoh kti lang ka long kaba eh ia ka KSU ba kan ia khun pyrshah ia kine ki kam leh thok kaba ktah ia ka lawei ki khun samla ka jylla, pynpaw u chairman ka KSU Employment Monitoring Cell u Samla Reuben Najiar sha ki lad pathai khubor.
U la ong ruh ha ka jingiakynduh ka KSU bad ha ki bor pyniaid ka MPSC, ha ka jingshisha ki la kular ban pynlait paidbah ia ki Marks jong baroh ki samla ba iakhun ia katei ka examination MCS.
Namar kata, ka jingbym lah ka MPSC ban bat ia ka kular da kaba la rai ban nym pynlait paidbah ia ki marks jong ki samla bad kynthup ruh sa 62 ngut ha ka Additional Lists, ka la pynsuba iangi ka seng ba ka lah ban don ei ei sha lyndet. U la pynpaw ruh ba ka KSU kam ju dawa ban pynduh noh ia kane ka examination MCS, hynrei ka KSU ka dawa ba haba pynlong ia kane ka examination thungkam thungjam ka dei ban long kaba khuid kaba suba da kaba ka MPSC kan pynlait paidbah ia ki marks jong ki samla.
“Tang ban ioh daw, ka MPSC ka ai daw ban pynpaw ia ki marks ki samla ka ktah ia ka article 21 ka riti synshar ka ri” ong u Samla Najiar bad ka jingkylli ba mih nangne kaei kata ka jingktah. Ka Commission ka la dep ban pynlait ia ki kyrteng, ki roll number bad ki mark jong kito kiba ia khun ia ka MPS Physical test bad kane kajuh ka Commission ka ong ba ban pynlait ia ki mark ka ktah ia ka jinglong kyrpang jong ki samla ba iakhun ia kane ka examination. Ngi sngewlyngoh bad ngim lah ban tip shai balei ka MPSC ka sheptieng ban pynlait paidbah ia ki marks jong ka MSC preliminary examination, nalor ba la don ka jingdawa na ka seng bad ki samla.
U samla Najiar u la ong ruh ban shu ong ba kane kan ktah ia ka hok kyrpang ki samla ka long kaba bakla bad kaba ym lah ban pdiang bad kane ka jingleh ka MPSC ka lah ban don ei ei sha lyndet.
U Samla Najiar u la pyntip ruh ba u Chairman ka MPSC u la kyntait ban shim ia ka phone bad ka message jong u, ba ka KSU ka thmu ban kylli pyrthew halor ka jingslem ka MPSC ban pynlait ia ki Marks da kaba u la switched off ia ka Mobile Phone.
Shuh shuh, u Samla Najiar u la kynnoh ruh ba ka MPSC ka la leh ia kane ka kam kaba la bakla shaba palat naduh ba sdang ban pynlong ia ka jingwad bniah biang (reassessment) namar kum ka Commission kam dei ban leh Ia kane ka kam.
U la iathuh ruh ba ka MPSC ka la kam ba ka don ka jingbakla ha ki 3 tylli ki question paper bad la don ruh ka jingujor da ki samla, hynrei haduh mynta ngim pat tip mano kita ki samla kiba la ujor bad shaei kita ki 3 tylli ki question ba la bakla kumba ka MPSC ka la kam ne kynnoh.
