Da ki spah ngut ki trai bad ki nongñiah kali kamai ka jylla Meghalaya hapoh ka lama jong ka All Khasi Meghalaya Tourist Taxi Association (AKMTTA) hynnin ka sngi ki la ia lum paidbah ha madan Malki bad ban pynrem jur ia ka jingsngap mynthi da ki bor ka sorkar jylla halor ki jingdawa ba la buh da katei ka kynhun ki nongñiah bad trai kali kamai.
Ha ka jingialang paidbah jong ki dkhot ka AKMTTA, na ka liang kane ka Seng ki kali kamai ki rai ruh ban ai por satang 1 taiew ia ka sorkar jylla khamtam ia u Myntri Rangbah ka jylla u Conrad K Sangma ban ai ia ka rai kaba shai halor ki jingdawa jong kane ka seng.
Haba kren ha kane ka jingialang, ki nongialam ka AKMTTA, ki la pynpaw ia ka jingsngewkhia kaba jur halor ka jingkuman jong ki bor ka sorkar jylla ban shimkhia ban weng ia ki jingeh jong ki, ha kaba ia dei bad ka jingnang kiew ki kali kamai kiba nabar jylla kiba wan kiew ban kamai jakpoh sha ki jaka jong ka jylla, kiba la kylla ruh kum ka jingduhnong kaba khraw ia ki trai ri trai muluk kiba im jakpoh na kane ka kam kamai kali.
Ki la pynpaw ruh, ba ki nongñiah kali kamai ki dei ki ruh kum u budlung ba khlaiñ ban kyntiew ia ka kam jngohkai pyrthei ha kane ka jylla Meghalaya, bad ngin ia tylli mlon kawei hapdeng ki nongñiah kali kamai lem bad ki nongpyniaid ia ki kam jngohkai pyrthei ban khanglad ia ka jingiohlad ban wan kamai kyrthep da ki kali na kiwei ki jylla khamtam na Assam kiba ioh wan kamai khlem ka jingdon jong ki nongpeit pyrman.
Kumta hadien kane ka jingialang, la ia hun lang ban ap satang shitaiew ia ka rai jong ka sorkar jylla Meghalaya halor ki jingdawa jong ka AKMTTA bad lada ki bor ka sorkar kin nang kuman na ka liang ka synjuk ki nongñiah kali kamai kim banse ban shim pat da kiwei kiwei ki lad ki lynti.
