U Myntri khynnah ka sorka pdeng, uba dei peit ia ka tnad jong ka kam rep ka kam riang ha ka ri India, u Ramnath Thakhur ha ka sngi Saitjain u la wan ban jurip ia ka Ri Bhoi District, kaba dei kawei na ka District ba la shah jied hapoh ka ri India kum kata ka Aspirational District.
Kum u myntri ka sorkapdeng u Ramnath Thakur u la leit ruh ban jurip ia ka Ginger Development Centre bad ka Tea Development Centre, kiba dei ki jaka kiba don baroh ar tylli ha Umnsing. Ha kane ka jingleit jurip la synran lang ruh da u Deputy Commissioner ka Ri Bhoi, u Abhilash Baranwal bad kiwei kiwei ki ophisar na ka District.
Kine ki ar tylli ki centre, ki dei ki centre kiba don ia ka bynta kaba khraw ban kyntiew ia ka kam rep ka kam riang bad kaba kyrshan ruh ban kyntiew ia ki kam rep hapoh Ri Bhoi District bad ka jylla hi baroh kawei.
Hadien ka jingleit jurip ia kitei ki ar tylli ki jaka, u mytri ka sorkar pdeng u Ramnath Thakur u la pynlong ruh ia ka jingiakynduh lang ki ophisar ha Nongpoh na ka bynta ban wad jingtip halor ki jingpyntreikam ia ki skhim bapher bapher ban kyntiew ia ka kam rep ka kam riang.
Ka jingthmu ba la pynlong ia kane ka jingiakynduh lang, ka long ruh ban thaw ia ki lad ki lynti ban dang shim khia shuh shuh ha kaba pyntreikam iaki lad jingiarap na ka sorkar pdeng kum kata ka Aspirational District khnang ba kane kan iarap ban kyntiew ha baroh ki liang jong ki kam pynroi pynpar ha kane ka District.
