Nongpoh, Naiwieng 19: Ka Super Division jong ka Ri Bhoi District Sports Association (RBDSA) kaba la long mynta ka sngi ha madan Umdihar, ha kaba ka jingiakhun ka la long hapdeng ha Umran Dairy Sports Club pyrshah ia ka Kongripara Sports Club bad ha katei ka jingiakhun ka la kut noh ha ka jingiakhaid kaba 1-1.
Ia katei ka lympung ialehkai jong ka RBDSA, la plie pyrda da u MDC ka Nongpoh u Bah Balajied Ranee, ha ka jingdon ryngkat, u Bah R.R Makdoh Adviser RBDSA, u Bah R.B Shadap President RBDSA lem ki riew rangbah, ki nongkitkam ka RBDSA lem bad kiwei.
Haba phai sha katei ka jingiakhun, ka Umran Dairy SC ka la ioh ban thep kol nyngkong, ia kaba ki la ioh ban thep ha ka kylla step jong ka jingiakhun, hynrei ka Kongripara SC ka la ioh ban pynphai kylla ia katei ka kol ha ka kylla miet jong ka jingiakhun, kaba la pynlong ia ka jingiakhun ba kan iakhaid da 1-1 bad ba kin hun ban iasam mar shi poin.
Kum ban shu kdew hangne, ba ha kane ka kynti kaba mynta, ki don 12 tylli ki kynhun ialehkai kiba don ha ka kyrdan ka Super Division bad kano kano ka kynhun ka ban long kum ka lahduh ha ka Super Division, kan sa ioh ia ka kabu ban mihkhmat ia ka RBDSA sha ka Meghalaya State League.
