Haba kut noh ka lympung ialehkai phutbol, ia kaba la pynlong da ka RBYF Raid Madan Kyrdem Circle ha madan Kyrdem, ka Mawbsein Sports Club, ka la ioh ban rah ia ka namlahduh, hadien ba ka la lah ban pynliem noh pyrshah ia ka Kyrdem Sports Club da 3-0.
Haba pynkut noh ia katei ka lympung ialehkai phutbol ka RBYF, la sakhi da ka jingdon u Damanbait Lamare, MLA Umroi, nangta u Bah Bipul Thangkhiew, President ka RBYF, u Bah Kynsai Nengnong, President ka RBYF Eastern Zone, u Bah Pynhun Mawroh, President RBYF Raid Madan Kyrdem Circle, ki nongialam shnong lem bad ki riew rangbah katei ka thain.
Ki nongialam ka RBYF Raid Madan Kyrdem Circle, ki la ong ba ka nongrim kaba la pynlong ia ka seng ban pynlong ia katei ka lympung ialehkai, ka long ruh kum shibynta ban kyntiew ia ka sap ka phong jong ki khun samla kiba don ha ka sap ha ka kam ialehkai phutbol.
Kaba na ka liang u Damanbait Lamare kum u MLA bad ruh u Bah Bipul Thang, kum u President ka RBYF, ki la ai jingiaroh ia ki nongialam ka RBYF Raid Madan Kyrdem, da kaba ong ba ka jinglah da ki nongialam ka RBYF ban pynlong ia kaba kum katei ka lympung ialehkai, kan iarap shibun eh ia ki samla na katei ka thain ba kin sei madan ia ka sap ka phong kaba ki don ha ka kam ialehkai phutbol.
Ka Mawbsein SC, kaba la long kum ka lahduh ha katei ka lympung ialehkai, ka la ioh ban khur ia ka song pisa kaba T. 25 hajar lem bad ka Trophy, katba ka Kyrdem SC, kaba la shah rem noh ha katei ka phainal, ka la khur ia ka song pisa kaba T. 15 hajar lem bad ka Trophy.
