Na ka daw ka jingkhapngiah palat ha ki surok ka sor Nongpoh kaba la pynthud ia ki paidbah ha ka leit ka wan khamtam ki khynnah skul bad ki riew paidbah ba iaid ba ieng ha sor Nongpoh, ki Pulit na ka tnad Traffic na Nongpoh Police Station lem bad ki nongialam ka Nongpoh Region Auto Owner & Driver Association (NRAODA) ha ryngkat ki Nongïalam shnong ka Nongpoh bad ka Shnong Mawroh ki la mih sha surok bah ban pynbeit ïaki jaka pynïeng kali jong ki kali kamai bad ki kali ki riew shimet.
Ki pulit ophisar na ka tnad Traffic ryngkat kitei ki nongialam mynta ka sngi ki la leit ban jurip ha man la ki jaka ba pynieng ia ki Kali paidbah kumba la ju pynbeit naduh u snem 2017.
Ha ka jingjurip bad ka jingpeit bniah, la pynbeit ba ki Kali Auto Rickshaw ba kamai bad kiba pynieng ha baroh arliang ka lad ban rung sha sha ka shnong Mawroh ki hap ban pynjgnai kumba 5 meter na ka lad bad kumjuh ruh ki Auto Rickhsaw bad ki Kali ki riew shimet ba pynieng ha dong Sajer ki hap ban pynjngai kumba 5 meter na katei ka lad.
Ha kane ka sngi ki la pynshai ruh ba ki Kali ki riew shimet kim dei ban leit pynieng ha ki jaka ba la buh na ka bynta ki kali kamai paidbah bad ki Kali kamai ruh kim dei ban leit pynieng ha ki jaka pynieng kali ba la buh na ka bynta ki kali ki riew shimet.
Shuh shuh, ha kane ka sngi, hadien ka jingiakren bad ka jingiaphylliew jingmut, ka tnad Traffic na ka Nongpoh Police Station ki la rai ban pyrkhing noh ia ka jingiaid kali ha ki Service lane bad ruh ba kin sdang ban pyntreikam noh ia ka One way bad ka No Entrey ha baroh ar liang ka surok Service Lane, ha kaba ki la kyrpad iaki paidbah ba kin ia bud ryntih ia kine kiba la pynbeit khnang ba kan nym rah jingeh ia ki paidbah bad kan nym wan rah ka jingdheng kali ha sor Nongpoh.
