Ka Directorate of Sports and Youth Affairs ryngkat ka jingiatrei lang ka ophis u Deputy Commissioner ka Ri Bhoi bad ka ophis u Sub Divisional Officer ka Patharkhmah Civil Sub Division ki la rai ban pyni da ka Live Screening ha ka jingiakhun Semi phainal ka Durand Cup.
Kum ban pynkynmaw, ka Shillong Lajong bad ka Northeast Football Club ki dei ki ar tylli ki kynhun ki ban ia knieh ban ioh rung sha ka thup jong ka phainal ka Durand Cup bad kine ki ar kynhun kin ia aireng ha ka 26 tarik u Nailar 2024 ha JN Stadium, Shillong.
Kumba la pyntip da u Additional Deputy Commissioner u Bah M.B Tongper, la ong ba kane ka jingpynia ia ka Live screening kan long ha ki ar jaka ha Ri Bhoi, kawei ha Madan Pahamsyiem bad kawei pat ha Patharkhmah.
U la ong ruh ba na ka liang ka bor synshar District ka Ri Bhoi ryngkat ka Directorate of sport and Youth Affairs ki la shim ia kane ka bynta ban buh da ka Live screening naduh ka por 5.30 janmiet ha ka 26 tarik u Nailar 2024, ka dei ka sngi ba kitei ki ar kynhun kin ia khnieh ban rung sha ka thup jong ka phainal ka Durand cup ka long shi bynta ban ailad ia ki paidbah ba ieit ia ka jingialehkai phutbol kiba ym lah ban ioh ban leit sha Nongbah Shillong bad da ka jingdon kane ka Live Screening ha Ri Bhoi ki paidbah ruh kin ioh ban ia sakhi ia kane ka jingiakhun Semi phainal ka Shillong Lajong pyrshah ia ka Northeast Football Club.
Namarkata, na ka liang ka ophis u Deputy Commissioner ka Ri Bhoi ka khot ka wer ia ki paidbah kiba kwah ban ia skhi ha katei ka jingiakhun Semi Final ka Shillong Lajong bad ka Northeast FC ba kin ia wan sha kitei ki ar tylli ki jaka ba la pynkhreh khnang ba ki paidbah ruh kin ioh lang ban sakhi ia kane ka Sem Final ka Durand Cup ha Nongbah Shillong.
