Nongpoh, Nohprah 06: Kan long shisha ka sngi kaba sah jingkynmaw ha ka jylla Meghalaya khamtam na ka bynta ka Ri Bhoi District, ha kaba mynta ka sngi u Myntri ka sorkar pdeng uba dei peit ia ka tnad Textile u Giriraj Singh u la wan ban plie paidbah mynta ka sngi ia ka Integrated Textile and Tourism Centre kaba don ha Saiden Nongpoh ha Ri Bhoi District

Ha kane ka sngi u la plie paidbah ruh ka Multi-Day Ekta – Exhibition cum knowledge sharing for Textile advantage  programme ha ITTC Nongpoh Ri Bhoi Distrct.

Ha kane ka sngi la sakhi lang ruh da ka jingdon lang u Myntri  khynnah ka sorkar pdeng uba peit ia ka tnad Textile u Pabitra Margerita, u Myntri ka tnad Textile ka sorkar Meghalaya u Bah Metbah Lyngdoh, u MLA ka Nongpoh u Bah Mayral Born Syiem, u MLA ka Umsning u Dr. Celestine Lyngdoh, ka MDC ka Nongpoh ka Kong Rona Khymdeit bad kiwei kiwei ki heh ophisar ka sorkar na ka tnad Textile ka sorkar India bad na Meghalaya.

La pynphuh pynphieng ruh ha kane ka sngi, da ka jingshim bynta naduh ki nongshna jingshna, ki nongthaiñ jaiñ, ki nongthir ksai bad kaba la kham paw ka dei ka jaiñ ryndia kaba pynmih na Ri Bhoi. La pynlong ruh ia ka jingpyni nam ia ki riam kiba itynnad kaba la pynsaindur lyngba ki jingriam ba la shna da ki jain ryndia ba la shim bynta da ki thei bad ki rang kiba la riam lyngba ki riam ba la shna ne pynwan dur da ki jain ryndia.

Haba kren ha kane ka sngi kum u kongsan bad kaba long ka jingmyntoi kaba khraw bha ia ka jylla Meghalaya, ka dei kaba u Myntri ka sorkar pdeng ba dei peit ia ka tnad Textile u Giriraj Singh u la kular ban wan rah ia ka Handloom Service Centre ha Meghalaya, lada ka sorkar Meghalaya ka kloi ban ai ei ia ka jaka kaba 10,000 sq ft. kane ka Handloom Service Centre kan ai jingmynto na ka bynta ki nongdie jingdie bad ki nongthied na kylleng ka ri bad wat na shabar ka ri.

U la ong ruh lyngba ka jingdon kane ka Handloom Service Centre ha Ri Bhoi, kaba don mar syndah bad ka Guwhati kan kyntiew ruh kum kata ka jaka ia thied ne ia die ha ki jylla shatei lam mihngi ka ri India. U la ong ruh ka ri India ka don ia kata ka jinglong kyrpang da ka jingdon ki jain rusom, ki jain muga, ki jain ryndia bad jain Tasar ki dei kiba la pynmih na ki jylla shatei lam mihngi ka ri India ba la don ruh kata ka jingithuh wat sha ka ri China.

U la ban khia ruh halor kata ka thain ka wet, ki kam shna jingshna kiba long tynrai ba ki jylla shatei lam mihngi ka ri India ka long ka nuksa ia ka ri India, ha kaba yn shim khia ban pyniaid iew ym tang hapoh ka ri India, hynrei ha ki ri ka pyrthei

Shuh shuh, u la bynrap ruh da kaba ong, ba kane ka jinglong kyrpang ki jylla shatei lam mihngi ka ri india halor ka thain ka wet, ki kam shna jingshna kiba long tynrai kan sakhi ruh ban pynkupbor bad ban ai jingmyntoi ia ki samla ki jylla shatei lam mihngi ka ri India bad khamtam ban pynkut noh ia kata ka jingshah lehbein ki samla na katei ka thain shatei lam mihngi ka ri India lyngba kane ka jinglongkyrpang jongki ha ka thain ka wet, ka kam shna jingshna bad ka jingpynmih ia ki jain jain rusom, ki jain muga, ki jain ryndia bad jain tasar, u la bynrap.

Kiwei kiwei kiba la ai jingkren ha kane ka sngi ki kynthup ia u u Myntri  khynnah ka sorkar pdeng uba peit ia ka tnad Textile u Pabitra Margerita, u Myntri ka tnad Textile ka sorkar Meghalaya u Bah Metbah Lyngdoh bad kiwei de, kiba la pynpaw ia ka jingkmen ba la ioh ban plie paidbah ia kane ka Integrated Textile and Tourism Centre ha Nongpoh kaba long ka jingmyntoi na ka bynta ki nongthain jain, ki nongshna jingshna ha ka liang ka ioh kam ka ioh jam bad ruh ban kyntiew ia ka ioh ka kot jong ki.