Ka Dorbar Shnong Nongsder, ha Ri Bhoi District, da ka jingsarong ha ka Janmiet jong ka sngi Thohdieng ka la pynkup burom ia u Dr. Ricky A.J Syngkon, kaba dei hadien ba u la shah jied kum u MP ba a Shillong Parliamentary Seat, ha kane ka election MP kaba dang shu dep ha ka ri.
Kane ka jingpynkup burom ka Dorbar Shnong Nongsder ia u Dr. Ricky A.J Syngkon, ka dei ka jingai khublei kaba kyrpang na ka liang ka shnong bad ruh ban pynpaw ia ka jingsarong ia ka Shnong Nongsder, uba la shah jied kum u MP ha ka jylla, namar u Dr. Ricky A.J Syngkon, u dei u nongshong shnong ka shnong Nongsder ba hap ha ka Block-6 ba kum ka shnong ka dap shisha da ka jingsngewsarong.
Ha kane ka sngi, na ka liang ka Dorbar Shnong Nongsder, nalor ka jingpynkup burom ia u Dr. Ricky A.J Syngkon, ka la pynkup burom ruh ia ki ar ngut ki Longkmie ba kynthup ia ka kong Kmoin Wahlang bad ka Kong Wandashisha Dewkhaid, kiba long ki nongjop ha ka 1st Pan India Federation Cup National Masters Game -2024 ha Telangana bad mynta kin sa leit ban mihkhmat ia ka ri India sha ka 13th Pan Pacific Masters Games-2024 ha Gold Coast, Queensland, Australia ka ban sa long ha u bnai Naiwieng 2024.
Ha kane ka jingpynkup burom la don ryngkat naduh u Rangbah Shnong u Bah Jonas Lyngdem, u Secretary Shnong u Bah F. Sohkhlet, u Bah W. Shangpliang, rangbah shnonng barim bad kynthup ruh naduh ki longkmie, ki longkpa, ki khun samla bad ki paidbah nongshong shnong ka Shnong Nongsder.
Na ka liang u Dr. Ricky A.J Syngkon, haba kren ha kane ka sngi, u la ai khublei kyrpang ia ka Dorbar Shnong Nongsder bad ia baroh ki nongshong shnong, kiba la ai burom ia u, da kaba pynkup burom bad u la pynpaw ruh ba kane ka jingjop jong u, ha kane ka election MP ruh ka dei jingpynjop ki paidbah.
Kum u nongmihkhmat sha ka ïing Dorbar thaw aiñ ha Lok Sabha, u Dr. Ricky AJ Syngkon, u la ong ruh ba u donkam ia ka jingkyrshan bad ka jingiatrei lang ki paidbah na ka bynta ban wan rah ia ki kam ai jingmynto ia u paidbah bad kum u nongmihkhmat ba la bynshet da ki paidbah u la kular ruh ba un sa kren ia kiba bun ki mat ki jura jong ka jylla sha ka ïing dorbar thaw aiñ ha Lok Sabha.
Shuh shuh, ha kane ka sngi, u la ai ruh ka jingnkitbok kitrwaing ia ka Kong Kmoin Wahlang bad ka Kong Wandashisha Dewkhaid, ki ban mihkhmat ia ka ri India sha ka 3th Pan Pacific Masters Games-2024 ha Gold Coast, Queensland, Australia bad u kyrmen skhem ruh ba kin trei shitom na ka bynta ban wan rah ia ka nam bad ka burom nyngkong eh ia ka jylla Meghalaya bad ia ka ri India hi baroh kawei.
