Ki bor pulit ka jylla Assam, mynta ka sngi ki la ioh ban kem sa u trai jong ka jaka ai jingsumar ia kiba la ngop ha ki jingdih lane ka ‘Rehabilitation Center’ kaba la ai kyrteng New Life Foundation halor ka jingshah pyniap dusmon jong uwei u samla na ri lum Garo, uba la tip kyrteng kum u Niksamseng Marak ha ka miet jong ka 3 tarik u bnai Naitung, 2024.
U tei u trai jong katei ka ‘Rrehabilitation Center’ kaba don ha Nayapara jong ka Goalpara District udei uba la tip kyrteng kum u Mridul Islam ba ju khot sin kum u Dipak bad uba la phetrieh ialade naduh katei ka jingjia shah pyniap utei u samla Garo. La iathuh ba utei u Mridul Islam udei uba don kyrteng hakhmat eh ha kane ka jingtohkit jong ki bor pulit.
Kum ban shu pynkynmaw biang, ki bor pulit ka thanad Krishnai jongka Goalpara District ka jylla Assam, ha ka 2 tarik u bnai Naitung, 2024 ki la kem ia u Niksamseng Marak lem bad ar ngut kiwei pat ki paralok jong u, halor ka jingkynnoh ba u la rah drok bad leit ban buh pat iaki sha katei ka New Life Foundation. Ha ka miet jong ka 3 tarik jong u bnai Natitung, 2024, la ioh jingtip ba utei u Niksamseng Marak u la khlad noh hapoh katei ka New Life Foundation.
Ha kaba nyngkong, ki bor pyniaid katei ka New Life Foundation ki la kynnoh ba utei u Niksamseng Marak u la phasi ialade bad kylla ktien biang hadien ba u la tied iala ka jong ka khlieh ha ka kamra sum, kaba la pynartatien bad pynbitar ia ki bahaing hasem, ki bym sngewlah ban ngeit ia katei ka jingkam katei ka jaka ai jingsumar da kaba dawa ban pynlong ia ka jingtohkit ban lap ia ki jingshisha.
Hadien ka jingtohkit jong ki bor pulit bad lyngba ka jingioh ia ki durkhih CCTV, la iohi ba u Niksamseng Marak u la shah pyniap da ka jingshah shoh dusmon ha ki nongtrei bad kiwei de ki briew kiba shah sumar ha katei ka jaka.
Shuh shuh, ki bor pyniaid District ka Goalpara ha ka 11 tarik u bnai Naitung, 2024, ki la leit ban khang khyrdep noh ia katei ka New Life Foundation, halor katei ka jingjia shah pyniap dusmon u Niksamseng Marak.
Kumba long mynta, nalor ka jingshah kem jong utei u trai katei ka New Life Foundation mynta ka sngi, ki bor pulit ka jylla Assam ha kine ki sngi kiba lah dep ki la kem ruh haduh 8 ngut ki briew kiba donkti, kynthup ia ki 6 ngut kiba la shah pynkynriah noh sha phatok ia kiba la tip kyrteng kum u Jintu Chakraborty, u Mohsen Khan, u Hanif Ali, u Pranjyoti Nath, u Dhanmoina Banikya bad u Kunal Das.
