Shillong, Jylliew 11: U Symbut myntri rangbah ka jylla bad uba dei ruh u National Vice president ka NPP, u Bah Sniawbhalang Dhar mynta ka sngi u la pynpaw ia ka jingsngewskhem ban jop ha kan MP election shiteng samoi na ka Shillong Parliamentary Constituency, ba u Dr. DRL Nonglait u dei kum u kyrtong ka party ban aireng ha kane ka election MP shiteng samoi.
Haba kren sha ki lad pathai khubor, u Bah Sniawbhalang Dhar u la pynpaw ia ka jingsngewskhem ban jop ka NPP, kaba dei lyngba ka jingwan kyrshan ki paidbah bad ruh ba ka party ka la pynkhlain ban trei shitom na ka bynta ban pynjop ia u kyrtong ka NPP ha kane ka election MP shiteng samoi.
U la ong ruh ba na ka liang ka party ruh ka la trei shitom bad u ai ruh ka jingkhublei ia ki unit treikam bapher bapher ka party NPP ha ki Constituency bapher baher bad mynta ka kynti ki don ki dak ki shin ba ka party NPP kan jop ha kane ka MP election shiteng samoi.
Haba jubab halor ka jingbym don ki kyrtong kynthei ha kane ka MP election shiteng samoi, u Bah Dhar u la ong ba ka Party NPP ka dei ka party kaba shim lang ia ka sur jong baroh ki nongialam bad ki nongkyrshan na ki 36 tylli ki Constituency bad dei ka sur jong baroh kiba la rai ban pynskhem iau Dr. DRL Nonglait kum u kyrtong ka NPP ban ia khun ha kane ka MP election shiteng samoi na Shillong Parliamentary Constituency.
Shuh shuh, u la bynrap ruh da kaba ong halor ki jingioh lum jingtip na ki nongkyrshan ka VPP mynta ki la phai khmat shaka NPP khamtam ha Khasi-Jaintia bad kumba long mynta man la ka sngi ka VPP ka la dang hiar ha Khasi-Jaintia ba ki paidbah ki la phaikhmat sha ka NPP.
Sa peit ruh
