Ban pynkhlaiñ bor bad kum kawei ka thong ban ia trei lang na ka bynta ban ia khun pyrshah ia ki kam lehnoh bad kiwei ki kam sniew ha ki thain khappud, ki heh shipai BSF bad BGB ha ka jingiakynduh lang ba saw sngi ha Nongbah Shillong lyngba ka Inspectors General BSF – Region Commanders BGB level Border Co-ordination, ki la ia rai ban ia trei ryngkat na ka bynta ban pyrshah ia ki kam lehnoh bad kiwei kiwei ki kam sniew ha ki thain khappud ka India bad Bangladesh.
Kane ka jingiakynduh lang ki heh shipai BSF bad BGB ka la kut noh mynta ka sngi, kaba dei hadien ka jingiakynduh ba saw sngi, kaba ki la ia thir ia tai halor ki lad ki lynti kumno ban pynduhjaid ia ki kam lehnoh bad kiwei kiwei ki kam sniew kiba ktah ia ka imlang ka sahlang ha ki thain khappud.
Ïa kane ka kynhun shipai BSF la ïalam da u IG Tripura Frontier u Patel Piyush Purusottam Das bad u Md Shazedur Rahman Additional Director General, Region Commander, u Chattogram uba dei u khlieh jong ka kynhun shipai Bangladesh kaba don 13 ngut ha kane ka jingïalang.
Kine ki shipai pahahara ha khappud ba kynthup ia ka BSF bad BGB lyngba kane ka jingiakynduh lang ki la soi ruh ia kata ka soskular ba la tip kum ka Joint Record of Discussion (JRD), kaba ki la shim rai ban ia trei ryngkat haba ka iakhun pyrshah ia ki kam lehnoh ne ki kam sniew, ha ka thain khappud.
Haba kren sha ki lad pathia khubor mynta ka sngi, u Patel Piyush Parusottam Das, u la ong ba ki shipai BSF bad BGB ki la ia tai sani ha kane ka jingiakynduh lang bad ki la shim ruh ka sienjam na ka bynta ban ia trei lang kum kita ki shipai pahara ha khappud ban wan rah ia ka shongsuk shongsain bad ban ia khun pyrshah ia ki kam sniew.
U la ong ruh lyngba kane ka jingiakynduh lang la ia kren sani ruh halor ki mat bapher bapher kiba iadei bad ka jingmyntoi jong ki arliang mamla, na ka bynta ban plie ia ki lad ki lynti ban pynbha ia ka jingiasngewthuh jingmut bad ka jingiatreilang hapdeng baroh ar tylli ki shipai pahara khappud.
U la pynpaw ruh da kaba ong, ha kane ka jingiakynduh lang la kham bankhia shibun eh, ia ki lad ban ia khun pyrshah ia ki kam lehnoh, ki kam sniew kiba mih ha ki thain khappud bad kumjuh ruh ka jingshalan tuh ia ki Drok bad kiwei ki jingdih basniew, ka jingpynkhein ia ki kyndon ain khappud bad kumjuh ruh wat ia ki kam pynroi ha khappud, ka ban ai jingmyntoi ia ki paidbah, nalor ka jingshim rai ban ia trei lang lyngba kata ka Common Co-ordinated Border Management Plan (CBMP).
” Ha kane ka jingiakren, ki la shim ruh ka rai ba radbah, ba ki shipai BSFbad BGB kiba pahara ha ki thain khappud, ba kin pynkhlain ïa ki jingïadei ba jan eh, kaba la la don lypa ban ïatreilang na ka bynta ban wad ïa ki lad ki lynti kiba lah ban weng ïa ki jingeh bapher bapher kiba ïakynduh da baroh ar tylli ki shipai na ka bynta ban wan rah ia ka shongsuk shongsain bad ban pynkhlain shuh shuh ia ka jingiatrei lang kaba dei lyngba ka jingiashaniah bad ka jingiatrei lang” la ong u Das.
Kum ka lad ka lynti ban wan rah ia ka jingiatrei bad ka jingiashniah, une u heh jong ka kynhun shipai BSF, u la ong ba la don lypa 2 ngut ki heh Shipai BSF bad BGB, kiba ïaid shaphrang ha ka jingïadei paralok jong ki na ka por sha ka por bad da kaba ki la wan ban shim bynta ruh ha kane ka jingiakynduh lang ba la tip kum ka Inspectors General, BSF – Region Commanders, BGB level Border Co-ordination, kiba dei katkum ka lynti ne ka rukom ba dei ban leh.
U la ong ruh kum kane ka jingiakynduh lang la pynlong ruh ha Chattogram, Bangladesh ha bnai Nailur 2023.
U la ong ruh naduh katei ka jingiakynduh lang, ki shipai BSF bad BGB, ym tang ba ki la tei ia kata ka jingiadei lok kaba jan bad ki la don ruh kata ka jingiasngewthuh jingmut ban don ka jingshaniah bad ka jingiatrei lang na ka bynta ban iakhun pyrshah ia ki kam sniew ha khappud lyngba ka jingiakren ba don jingmut kaba ki la ju pynlong na ka por sha ka por.
Kumba la pynpaw da uneh u heh shipai BSF, la ong ruh kane ka jingkakynduh lang kam dei tang ka thong ban don ka jingiadei paralok bad ruh ka thong ban wan rah ia ka jingiaburom ba markylliang bad ka jingshaniah hapdeng ki shipai BSF bad BGB kiba pahara ha ki thain khappud.
Shuh shuh, u la bynrap ruh da kaba ong, ba u don ka jingkyrmen kaba skhem lyngba kane ka jingiakynduh lang kan long ka jingmyntoi ba kin dang lah ban ia trei lang ha kaba wan rah jingsuk ha khappud bad kum kine ki jingiakynduh lang kin dang pynlong nangne shakhmat khnang ban lah ban ia kren ne ia tai sani ban don ka jingiadei kaba jan ha ki por ban sa wan ban ai ka jingshakri kaba paka kum kita ki shipai pahara ha khappud.
