Nongpoh, Naitung 13: U Deputy Commissioner ka Ri Bhoi, u Dr. Abhishek Saini, u la kular hakhmat ki nongialam ka FKJGP Baridua Circle, ba un shimkhia halor ka jingujor ka seng ban pynpaw ia ka jingpyrshah halor ka jingdon ki katto katne ki jaka pule, ki jaka sah jong ki samla pule, ki dukan lem kiwei bad kiba pyndonkam da u Pin Code Assam ha ki shnong kiba la hap ha ka jylla Meghalaya, kiba don ha ki thain Baridua, Ri Bhoi, iathuh ki nongialam FKJGP Baridua Circle, hadien ba ki mih na kamra u Deputy Commissioner.
Ha katei ka sngi ba kitei ki nongialam ka FKJGP Baridua Circle, ki la leit ban kynduh ia u Dr. Abhishek Saini, la ialam da u Bah Denis Nongrum, President ha ryngkat ka jingdon u Bah Allan Donald Sohpdang, General Secretary lem bad kiwei ki dkhot na katei ka Circle.
Sa pule ruh: Ba Shim Khia Mardor Ki Pulit EKH, La Ïoh Kem Ïa 3 Ngut Kiba Pynjulor Ïaka Oak Homestay
Lyngba katei ka jingleit ban kynduh ia u DC Ri Bhoi, kitei ki nongialam ka FKJGP, ki la ioh ruh ban aiti da ka jingthoh, kaba ki la pynpaw, ba ki pyrshah jur ia ki jaka pule, ki jaka sah ki khynnah pule lem bad ki dukan, kiba pyndonkam da u Pin Code Assam uba dei 781023, hynrei ka jingshisha u Pin Code ha thain Raid Marwet u dei 793101, namar ba ki dei ki shnong kiba dang hap ha Meghalaya.
Haba kren sha ki lad pathaikhubor, kitei ki nongialam ka FKJGP, ki la ong ba ki la ioh ban pynsngew ia ki nongrim ka seng, ba kin pyrshah ia ki jaka pule, ki jaka sah ki khynnah pule lem bad ki dukan, kiba pyndonkam da u Pin Code Assam bad khamtam eh ba katei ka thain, ka dei kaba don ha khappud bad ka Assam.
Ki la iathuh ruh, ba na ka liang u DC, un sa bthah ia ka tnat Postal Department ba kan pynbeit ia katei ka jingdon ki jaka pule, ki jaka sah ki khynnah pule lem bad ki dukan, kiba pyndonkam da u Pin Code Assam ha ki shnong kiba la hap sha Meghalaya.
Sa peit ruh
