Nepal, Nailar 31: Ki briew kiba la khlad haka jingshlei ka umsaw kaba shyrkhei ha khappud ka ri Nepal bad Tibet kala poi sha kumba 919 ngut bad kumba 4793 la iathuh ba ki dang jah rngai kat haduh mynta ka sngi.
Ka tnad National Disaster Risk Reduction and Management Authority ka ri Nepal kala pyntip ba na kitei ki san hajar duna kiba jah rngai, kumba 592 ngut kidei ki nong jngohkai pyrthei
Ka jingwad ia ki briew kiba dang sahkut hapoh ka krem pynmih bording ilektrik hapoh Rasuwa District ka dang iaid shakhmat bad la ong ba palat 900 ngut ki dang jahrngai ha ki kylleng ki projek pynmih bording jong ka ri. Tad haduh mynta ka sngi, la ioh ban pyllait im ia kumba 10 hajar ngut ki briew naduh ba sdang katei ka jingjia shlei katei ka umsaw myn haka sngi Balang kaba lah dep.
La iathuh ruh ba ki bahaing hasem jong kitei ki lanot kiba la duh noh iala ka jingim ha katei ka jinglynshop ka mariang, ki la sdang pynlong iaka jingtep paidbah iaki ba khlad khamtam haki thain Chitwan bad Nuwakot, katba ka jingwad iaki dang jah rngai ka dang iaid shakhmat.
La iathuh ruh ba ka ri China ka dang pynlong iaka jingpeitngor ha katei ka thain khamtam ha jaka ba sdang katei ka jingshlei ka umsaw bad maham ruh ba ka jinglah ban hap u slap, ka jingnang kiew jong ka um ha ki pung kiba don marjan, kala nang pynsyllang bad ktah jur iaka jingwad iaki briew kiba khlad bad ruh ban ai jingiarap ia ki lanot kiba lait im.
Peit ruh:
