Wat La Saphriang Ki Khubor Hamsaia, Dang Kyntait U President UDP Ban Pyniasoh BJP Ki MLA

Shillong, Nailar 31: U Myntri Sorkar u badei ruh u President ka United Democratic Party (UDP) u Bah Metbah Lyngdoh hynne ka sngi ula kyntait iaki khubor ba 9 ngut ki MLA ka UDP kila thmu ban iasoh shaka Bharatiya Janata Party (BJP).

Kane ka wan tang shi sngi ba la saphriang haki rynsan Social Media ba bun ki MLA kynthup ki Myntri Sorkar jong ka UDP ki don ba Guwahati, Kolkata bad Delhi ban iakren bad ki nongialam ka BJP na Delhi ban iakren pynbeit ban pynrung iaki 9 ngut ki MLA jong ka UDP shaka BJP.

Haba kren shaki lad pathai khubor u Bah Metbah ula ong ba kine ki khubor ki mih tang namar ba shi bnai mynshwa ka kynhun MLA jong ka UDP kila kynduh ia u Myntri Sorkar Pdeng u Amit Shah ban iakren halor ka jingthmu wanrah jingpynkylla iaka FCRA.

U Bah Metbah ula kam ruh ba u sngew kyndit ban iohi haki lad pathai khubor ba ma u ruh u don sha Delhi ban iakren bniah halor ka jingthmu pyniasoh noh ka UDP bad ka BJP.

Pule ruh: Bynniaw U Bah Ardent Bym Ailad Ka Sorkar Ban Ïatai Ïaka FCRA Haka Dorbar Synrai

“Hoid hadien ba sngi khatduh jong ka dorbar kila don katto katne ki MLA kiba la pyntip sha nga ba kin leit sha Kolkata naka bynta ki kam shimet hynrei kam don eiei pat ka kam Politics kumba la pynmih haki lad pathai khubor” la ong u Bah Metbah.

U Bah Metbah ula ong ba jan baroh ki MLA jong ka UDP ki don hala ki constituency bad ha shnong hynrei ka long kaba bakla ba ki lad pathai khubor kin shu kam ba ki don sha Guwahati, Kolkata bad Delhi.

Peit ruh:

“Nga kyntu iaki lad pathai khubor ba kin da pynshisha shwa iaka jingshisha daka ba phone ruh namar kane ka jingpynmih iaki khubor khlem da pynshisha ka ialam bakla ia u paidbah” ula ong.