Nepal, Nailar 29: Ka jingshlei ka umsaw ba shyrkhei haki thain khappud ka ri Nepal bad Tibet kala shim iaka jingim jong kumba 626 kat haduh mynta ka sngi bad kumba 3 hajar tam ki briew ki dang jahrngai ba kynthup lang iaki nongjngohkai na kylleng ki ri ka pyrthei.
Kumban shu kdew hangne, katei ka jingshlei ka umsaw kadei hadien ka jingtwa kynsan ki thah na ki lum Himalaya kat haduh ba kala wanrah ka jingjulor kaba shyrkhei bha iaki shnong ki thaw, khamtam ha ki bynta jongka Rasuwa District, kiba la shah rat naphang tang da ki minit.
Ki shipai ka ri Nepal ha ryngkat ki bor pulit ki dang iai bteng miet la bad sngi ban pynlong iaka jingwad ban pyllait im iaki briew kiba dang jahrngai khamtam ha ki bynta jongka surok krem ba pynmih bording ilektrik ha Rasuwa, kaba la antad ba ki dang don bun ngut ki briew kiba la sahkut shapoh.
Pule ruh: Bynniaw U Bah Ardent Bym Ailad Ka Sorkar Ban Ïatai Ïaka FCRA Haka Dorbar Synrai
Naka liang ka ri Nepal kala kyrpad iaki ri ka pyrthei ba kin ai iaka lad jingiarap pisa halor kane ka jingjia kaba ktah ia kumba palat 90 hajar ngut ki briew naka bynta ban ai jingiarap iaki lanot bad ruh ban tei pynbha biang iaki jingshah pynjulor haka umsaw.
Ka India kaba don iaka khappud kaba jrong bad ka ri Nepal, kala pynlong iaka jingpeitngor kaba kyrpang iaki lum thah bad ki pung kiba don ha ka jylla Uttarakhand naka bynta ban pynkhreh lypa ioh wan kano kano ka jinglynshop ka mariang bad ha kajuh ka por ban phah ruh iaki dawai dashin bad kiwei de ki lad jingiarap sha ka ri Nepal kaba la antad ba da ki spah ngut ki nong India ruh ki dang jahrngai.
Peit ruh:
