Bynniaw U Bah Ardent Bym Ailad Ka Sorkar Ban Ïatai Ïaka FCRA Haka Dorbar Synrai

Shillong, Nailar 29: U Bah Ardent Miller Basaiawmoit kum u MLA ka Nongkrem Constituency bad uba dei ruh u President ba rangbah ka VPP party, u la pynpaw ia ka jingbynniaw kaba khraw baa ka sorkar jylla kam shym la ailad ne wan rah ban iatai halor ka FCRA haka Dorbar Synrai, ba ha ka jingshisha la dei ban tai ne ia thir sani halor kane ka ain.

Kum ban pynkynmaw, ka sorkar BJP ka la thmu ban wan rah ia ka jingpynkylla halor ka FCRA ba la tip kum ka Foreign Contribution (Regulation) Amendment Bill, 2026 ha parliament, ha kaba ka jingthmu jong kane ka Bill ka long ban pyrkhing ne bishar bniah ia ki jingiarap pisa kiba wan na shabar ki ri (Foreign Fund) ha kaba kane ain lada pynkylla kan ktah jur bha ha ka jylla Meghalaya, ba ngim lah ban len ba dei da ka jingieng rangbah jong ki kynhun niam bapher bapher ba ngi la ioh ia ki jaka pule puthi kiba biang, ki jingshakri ha ka koit ka khiah kaba biang bad kiwei kiwei ki kam pynroi ba bun hi la leh da ki kynhun niam kaba ki ju ioh ia ki jingiarap na shabar ri.

Haba kren sha ki lad pathai khubor, u Bah Ardent miller Basaiawmoit kum u MLA ka Nongrem u la ong ba ha ka jingshisha kane ka mat jong ka FCRA ka la don ha ka thup ban ia tai ha ïing Dorbar ha kane ka Dorbar Synrai kaba la dang shu kut, hynrei kaba sngew lyngngoh na ka jinglynkot ka por bad ka jingbym ailad ka sorkar ym ioh satia ban ia kren ne ia thir halor kane ka ain kaba donkam bha ban iathir iatai.

Pule ruh: Kynduh DC, SP Ki Driver Bad MCTODA, Bthah U DC Ïaki Karkhana Ban Pynbiang Tulop & Bai Bam Ïaki Driver

U la ong ruh ha ka jingshisha ha kaba ia dei bad ka amendment Bill 2026 jong ka FCRA la dei ban pas da ka resolution da ka ïing dorbar hi baroh kawei bad ban phah ruh ia ka khubor kaba shai sha ka sorka India ba katei ka Amendment Bill jong ka FCRA kam dei ban treikam hapoh ka jylla Meghalaya.

Peit ruh:

Shuh shuh, u la pynpaw ruh baka daw kaba ngi donkam ban iatai ne ia thir sani ia kane ka Amendment Bill jong ka FCRA ha ka Dorbar, ka dei namar ba lada kane ka ain ka treikam ha ka jylla Meghalaya kan don ka jingktah kaba jur khamtam ia ki kynhun niam bapher bapher, namar jan baroh naduh ki jaka pule, ki jaka ai jingsumar bad kiwei kiwei ki dei ba pyniaid da ki kynhun niam kiba ju ioh ia ka jingiarap pisa ban pyniaid ia ki jaka pule, ki jaka sumar lyngba ki pisa kiba wan na shabar ka ri, u la bynrap.