Sah Umdum Ki Paidbah, La Tep Noh Iaka Surok Ba Tih Thliew Mar Ia Dep Ka Public Haring Bad Mano Ba Ai Bor

Shillong, Nailar 01: Ka jingtih syndon da ka thliew ban pynjot ia ka surok paidbah ba la kynnoh ban khanglad ia ka kynhun kiba pyrshah ban wan shim bynta sha ka Public Hearing ka Sree Cement kaba la long hynnin ka sngi ha Lum Syrman, ki la mih shibun ki jingkylli bad ki jingkynnoh, namar tang hadien ba la kut  noh katei ka Public hearing la don kiba la leit tep biang ia ka khyndew ba la khlong ha katei ka surok.

Kumba la sakhi lyngba ka dur khih, haba leit ban tep biang ia ka khyndew ba la dep ban khlong ha katei ka surok la pyndonkam da ka kor puhshilum (JCB) bad ha ka por ba tih ia ka surok ruh la pyndonkam hi da ka kor puhshilum.

Kane jingtih thliew ia ka surok ki dei ha ki bynta jong ka lad Tongseng Nongkhlieh, kaba dei ka surok PWD ban pyniasoh sha Saipung bad ym lah ban tip mano ba la don kti ha kaba tih ia katei ka surok kaba dei tang ka jingmih ka kynrum ka kyram ka Public Heaing ka Shree Cement Limited.

Pule ruh: Yn leit ker tawiar ka VPP iaka Secretariat ba dang mynthi ka sorkar iaki 10 tylli ki mat ba wan rah ka VPP

Halor katei ka public hearing la sakhi ba la mih shibun ki kynrum ki kynram, ka jingpynjulor ia ki Kali, ka jingiakawang maw bad wat ki bor pulit ki la hap ban pyndonkam da ka tear gas bad ka jingkylli kamih pat mano ba ai bor ban tih ia ka surok kaba la ktah ia ka leit ka wan ki paidhbah.

Halor kane ka jingtih thliew ia ka surok, wat na ka liang u President ba rangbah ka KSU u Samla Raymond, haba kren sha ki lad pathai khubor, u la buh ka jingkylli mano ba ai bor ban tih thliew  ha katei ka surok paidbah kaba la ktah ia ka leit ka wan ki paidbah bad ruh wat kito kiba leit shah sumar sha ki Hospital ki la shah ktah bad kumba long haduh mynta pat ym pat tip mano ba la ai bor bad mano ba la leh ia katei ka kam ban tih thliew syndon ha ka surok paidbah.

Peit ruh:

Na ka liang une u nongialam u la kynnoh ruh ba kumno kita kiba don kti ki ioh lad ban tih thliew ne pynjot wat ia ka surok ki paidbah, haba ha katei ka sngi la don lang naduh ka bor Synshar District bad ki bor pulit. U la kynnoh ruh ba kane ka dei ka jingbym shim khia ka bor synshar district bad ki bor pulit ha kaba ki briew kiba don kti ki la ioh lad ruh wat ban pynjot ne tih thliew ha ka surok tang namar ka jingdon katei ka public hearing ka Shree Cement ba ki bor District bad bor pulit kim shym la leh ei ei.