Katba nangmih ki sngi ki por, ki samla Khasi ki la nangpaw pyrthei ha ki kam ialehkai phutbol bad kiba la iohlad ruh ban mih madan ha kiwei ki klob ha ka ri, ban iakhun ia ki lympung ialehkai kiba heh ha ka ri.
Ha ka jingialehkai ka Durand Cup ba hynnin ka sngi, kaba la long hapdeng ka Bodoland Football Club pyrshah ia ka North East United Football Club, kaba la long ha Kokrajhar Assam, la iohi ia uwei u samla Khasi uba la tip kum u Wanboklang Lyngkhoi, uba la mihkhmat na ka Bodoland FC bad uba phong ruh ia ka Jersey No. 4.
La iohi ruh ba ha katei ka jingiakhun, watla ka Bodoland FC ka la shah rem noh da 2-0 hakhmat ka North East United FC, hynrei utei u samla Khasi, uba la ialehkai ha ki bynta ba shadien, u la lah ban ialehkai bha bad kyrshan tyngeh ia ka kynhun.
Ha kawei pat ka jingiakhun jong ka Durand Cup, kaba la long ha Kishore Bharati Stadium ha Kolkata, kaba la long hapdeng ka Punjab FC pyrshah ia ka CISF Protectors, ha kaba ka Punjab ka la lah ban pynliem ia ka CISF Protectors da 3-0.
Ha ka Punjab FC ruh la don uwei u samla Khasi uba la tip kum u Samuel Lyngdoh Kynshi, uba dei ruh u samla, uba la ioh ban mihkhmat teng na ka ri.
