Nongpoh, Nailar 04: Tang hadien Shisngi ba la mih ki jingshisha haki lad pathai khubor halor ka jingkynoh lum pisa na ki kali ba kit jingri kiba wan na shabar ban ioh rung sha ka jylla dakaba siew iaka pisa kaba ki la buh, naka liang ki Nongri jingri jong ka them Ri Bhoi ki la mih shakhmat ban pynpaw iaka jingsngewsih bad duh jingkyrmen.
Ka jingmih jong kitei ki Nongri jingri ban pynpaw iaka ki jingsngew ka dei hadien ba ki jingri jong ki, ki la iap lut naka daw ka jingsar ka khlam bad la kynnoh ruh ba dei naka jingioh lad ban rung ki jingri kiba nabar ka jylla khlem da peitngor bha iaka koit ka khiah.
Haba kren sha ki lad pathai khubor, naka liang kitei ki nongrep kiba kynthup ia u Bah Baisroy Lyngdoh Mawnai naka Shnong Shangbangla, u Bah Micheal M Suting na Nonglyngdoh, u Bah Samuel Hing, Kong Baiakmenlang Syngkli, kong Milinda Jyrwa kiba dei na Bhoirymbong lem bad kiwei kiwei ki la pynpaw ia la ka jong ka jong ka jingeh.
Kitei ki Nongri jingri ki la ïathuh, ba ka sorkar lyngba ka piggery Mission ka la kyrshan dakaba ai iaki ram ban pyrshang ieng hala ki jongki kjat ha kaba ki la pyrshang ban treishitom ban pyntreikam hok ban pynroi iaka kam lyngba ka ram kaba ki ioh naka sorkar, hynrei kane ka jingmih pynban ki jinglum khajna bad ban pynlait laitlan ïaki jingri kiba rung sha Meghalaya ka la long pynban kum ba pynapshrip ia ki Nongri kiba la shim iaka ram.
Pule ruh: KSU Warns Meghalaya Govt Over ‘Partial’ Public Hearing
Ki la iathuh ruh, ha kipor ba sdang ban ri Sniang ki sngew kumba ki la sdang ban im na kane ka kam ri jingri, hynrei naduh ba wan kane ka khlam (African Swine Fever) ka la sar lut iaki jingri bad ka jinglut Ksan ka la poi daki phew lak tngka kaba la wan shisha ïaka jingeh bad jingdiaw mynsiem.
Kitei ki Nongrep ki buh ka jingkyrpad naka sorkar ba kadei ban wan roh daka Khyrdop ban peitbniah iaka koit ka khiah jong ki jingri kiba wan nabar, ki buh ruh ka jingkyrpad ba ka sorkar ka dei ban map noh iaka ram jong ki bad ban siew ruh iaka jinglut ksan kaba ki la duh naka jingiap ki sniang na ka jingwan sar ka khlam.
Peit ruh:
Kitei ki nongrep ki la Pynpaw ruh ka jingkyrmen halor ka jingmih ka Hills Farmers Union kaba ju peit iaki nongrep bad kaba la mih ruh shakhmat ban khang lad iaki riew shim kabu ban ailad iaki jingri kiba nabar ban rung shapoh ka jylla dakaba siew iaka pisa kaba long kum ka ‘direct entry’ khlem da Peitngor iaka koit ka khiah jong ki mrad.
