Umsning, K’lyngkot 13: Haba sdang ka lympung ialehkai kaba la pynlong da ka KSU Umsning Circle, ia kaba la tip kum ka Maitshaphrang Cup Open To All Football Tournament, kaba la sdang mynta ka sngi ha ka Madan Umsning Patarim, ka kynhun ialehkai ka Nangkiew Irat Football Club, ka la lah ban pynliem noh ia ka Mawlai Impact, ha ka jingiakhun kaba la poi sha ka jingiashut Tie Breaker.
Khyndiat haba phai sha ka jingiakhun jong kitei ki artylli ki kynhun ialehkai ba radbah ha ka jylla, ka long ba ka kylla step bad ka kylla miet jong ka jingiakhun, ka la kut ha ka jingiakhaid kaba ym don kiba thep kol, kumta ki nongpyniaid ha katei ka jingiakhun, ki la rah noh sha ka jingiashut Tie Breaker bad dei ha ka Tie Breaker ba ka Nangkiew Irat, ka la lah ban pynliem noh ia ka Mawlai Impact da 5-4.
Ia katei ka lympung ialehkai phutbol ka KSU Umsning Circle, la wan ban plie da u Samla Eric Nongkynrih, Sports Secretary ka KSU Sengkmie kum u Kongsan bad u Samla Johny Nongrum, Sports Secretary ka KSU NKHD kum u Symbud kongsan, ha ryngkat ka jingdon kiwei ki nongialam ka KSU, ki riew rangbah lem bad kiwei.
Kum ban shu kdew hangne, ba ka nongrim kaba la pynlong ia ka KSU Umsning Circle, ba kan pynlong ia katei ka lympung ialehkai, kan long ruh kum shibynta ban pynsaphriang paidbah ia ka khubor ban pyrshah ia u Drok, u jingdih uba la pynjot ia kiba bun ngut ki khun samla.
Haba iadei bad katei ka lympung ialehkai, na ka liang ka KSU Umsning Circle, ka la buh ia ka song pisa kaba T. 5 lak na bynta ka kynhun nongjop bad T. 3 Lak na bynta kaba shah rem ha ka phainal, nalorkata kin sa don ruh sa kiwei de ki khusnam shimet.
