“Ka Kyntien ym lah, kam dei ban long ka daw ban khanglad na bynta ki samla haba ki kwah bad thrang shisha ban pule sha ki kyrdan shalor, ong u Samla James H. Mawphniang, General Secretary ka KSU, North Khasi Hills District bad uba long ruh kum u Secretary, Legal Affairs KSU Sengkmie, ha ka por ba u ai jingkren hakhmat ki samla Khasi bad kiba pule ha Regional Institute of Science & Technology (RIST) bad University of Science & Technology, Meghalaya (USTM), kaba don ha Baridua ha Ri Bhoi District.
Kitei ki kyntien na utei u nongialam ka KSU, ki la mih ha ka por ba u ai jingkren hakhmat kiba bun ki samla Khasi kiba pule ha RIST bad USTM, kaba dei ruh ka sngi ba ka KSU RIST-USTM Unit, ki la pynlong ia ka jingkynduh lang jong ki samla Khasi ba dang wan pule thymmai ha katei ka skulbah (Fresher’s Meet) naka bynta ban pynlong ka jingithuh ithaw, ban long kum shipara bad ruh ban iatylli haba ki Pule hapoh katei ka Skulbah.
Ha katei ka sngi ba ka KSU RIST-USTM Unit, ki la pynlong ia katei ka prokram, la sakhi ruh da ka jingdon u Samla Ferdynald Kharkamni, President ka KSU, NKHD, kiwei pat ki nongialam ka KSU kiba kynthup ia u Samla Alex Kharkrang, President KSU Byrnihat Circle, nangta ki nonghikai Khasi kiba hikai hapoh katei ka skulbah lem bad kiwei.
Lyngba jong katei ka sngi, nalor katei ka prokram jong ka jingkynduh lang hapdeng ki samla pule katei ka skulbah, na liang ka KSU ka la ioh ruh ban pynthymmai ia ki nongialam ba thymmai ka KSU RIST-USTM Unit na bynta ka samoi treikam jong u snem 2024-2025, kaba dei ruh ka unit kaba peit kyrpang ia ka bha ka miat bad ka eh ka shon jong ki samla pule ha katei ka skulbah.
Ha katei ka sngi kum ka jingsngewnguh naka liang ka KSU RIST-USTM Unit kala ai sngewbha ruh ia ki nongialam barim da ki momentous kum ka jingsah jingkynmaw halor ka jingshakri jong ki haka seng ha katei ka skulbah bad la pynphuh pynphieng ruh ha katei ka sngi da ki jingshad, jingrwai bad ka jingpyni riam bala shim bynta da ki samla pule khasi ba thymmai ha katei ka skulbah.
Ki nongialam ba thymmai ka KSU RIST-USTM Unit, ki kynthup ia u samla Balasumar Sohkhwai kum u Adviser, u samla Richie C Lyngkhoi kum u President, u samla Sdangmi Lhuid kum u Vice- President General, u samla Shootingstar Thangkhiew kum u Secretary, ka Samla Ialarihunshisha S. Myrthong kum ka General Secretary lem bad kiwei de.
