Kum ka jingai mynsiem ia ki samla pule bad ban pynshlur ba kin jied ia ka lynti ba kin poi sha ka thong jong ka jingim, ka Ri Bhoi Socio-Economic & Youth Development Society (RSEYDS) mynta ka sngi ka la pynlong da ka prokram ai jinghikai ba la tip kum ka ‘career guidance cum awareness program’ ha Holy Angel Secondary School, Bhoirymbong, kaba dei kawei na ka thong katei ka Society ban pynshlur ia ki samla ba kin tip ban iaid ha kata ka lynti ban poi sha ka thong jong ka jingim.
Ha kane ka prokram ai jinghikai la wan ban shim bynta da u MLA ka Umroi, u Bah Damanbait Lamare kum u kongsan bad la sakhi lang ruh da ka jingdon lang ka Principal ka Holy Angel Secondary School Bhoirymbong ka Jaimol James, u President katei ka Society u Bah Comfort Rympei, u Vice President u Bah Pyrshahbor Rympei, ki khynnah skul bad kiwei kiwei de.
Haba ai jingkren ha kane ka sngi kum u kongsan, u MLA ka Umroi u Bah Damanbait Lamarre, u la kham ban khia ia ki khynnah skul halor ka jingkongsan jong ka jingtrei shitom ha ki jingpule bad ka sap ba la ai kyrpang da u Blei, namar ban poi sha ka thong jong ka jingim donkam kata ka jingtrei shitom bad ka jingialam lynti jong ki riew shemphang kiba la biang ha ka kyrdan jingnang jingstad.
U la ai ruh katto katne ki symboh pyrkhat sha ki khynnah skul, ba kum ki khynnah skul haba ki pule ki dei ban dong ia kata ka jingphohsniew ban poi sha ka thong jong ka jingjop bad lada ki samla ne ki khynnah skul ki pyndonkam hok shisha ia ka sap kaba ki don kumba la ai kyrpang da u Blei kam don jingeh ban poi sha kata ka thong kaba ki angnud ban jop ha rygnkat ka jingialam lynti lang jong ki riew shemphang kiba la biang ha ka kyrdan pule puthi.
Ki ar ngut ki nongai jingkren (resource Person) ba kynthup ia u Dr. Maxwell Lyngdoh bad u Bah Comfort Rympei ki la ai jingkren bad ki jingpynshai halor ki bynta bapher bapher jong ka jingiaid lynti ha ka jingim bad ki la ai mynsiem ruh ki khynnah skul ba ki dei ban long kita kiba trei shitom bad don ia ka jingangnud ha ka jingim, namar khlem ka jingangnud bad ka jingtrei shitom kin nym lah ban poi sha ka thong jong ka jingjop ha ka jingim jong ki.
