Hadien ka Germany bad Switzerland, mynta sa ka England bad Spain ki ri kiba la pynthikna ban rung sha ka Quarter Final jong ka lympung iakhun phutbol ka European Cup 2024.
Ka jingiakhun kaba la long hynnin ka miet, kata hapdeng ka England pyrshah ia ka Slovakia, ha kaba ka jingiakhun ha ka kylla step, ka Slovakia ka la lah ban pynkhih jar nyngkong lyngba u Ivan Schranz ha ka minit ba 25 bad katei ka kol ka la neh haduh ba kut ka kylla step jong ka jingiakhun.
Haba bteng ka kylla miet jong ka jingiakhun, ka England ka la pyrshang ban thaw ia ki lad ki lynti na bynta ban pynphai ia katei ka kol, ba ki la shah thep ha ka Slovakia, ha kaba ka England ka la nion tyngeh, hynrei haduh ba la poi ki 90 minit jong ka jingiakhun kim shym la ioh ban pynphai, pynban ka jingeh bok jong ka England ka la jia ha ki minit ba la pynjlan ia ka jingiakhun, namar ki nongpyniad ia ka jingiakhun ki la airport 6 minit kum ka jingpynjlan ia ka por bad dei ha kaba kum katei ka por kata ha ka minit ba 90+5, ka England ka la ioh ban pynphai lyngba u Jude Bellingham.
Haba katei ka jingiakhun ka la poi sha ka jingiakhaid, la rah noh sha ka Entra Time, ha kaba tang mar ia ka sdang ka Extra Time, ka England ka la ioh biang ban pynkhih jar lyngba u Harry Kane bad kaba la neh haduh ba kut ka jingiakhun bad kaba la pynlong ia ka England ba kan pynliem noh ia ka Slovakia da 2-1.
Haba phai pat ha ka jingiakhun kaba la long hapdeng ka Spain pyrshah ia ka Georgia, ka Spain ka la pynthikna ïalade ban rung sha ka Quarter Final, ka dei hadien ba ka la lah ban pynliem ia ka Georgia da 4-1.
Haba phai sha ka jingiakhun jong ka kylla step, ka Georgia ka la lamkhmat ia ka jingiakhun lyngba ka kol kaba la bakla thep hi dang u rang ialehkai dien ka Spain u R. Le Narmand, uba la bakla thep ha ka minit ba 18 jong ka jingiakhun. Hynrei katei ka kol kam shym la neh slem, namar tang ha ka minit ba 39 ka Spain, ka la ïoh ban pyniakhaid lyngba u Rodri.
Haba bteng ka kylla miet, ki rangialehkai ka Spain, ki la nion tyngeh ia ki rang ialehkai ka Georgia bad ha kaba kum katei ka por, ki la ïoh biang ia ka kabu ban thep kol ha ka minit ba 51, ia kaba la thep da u F. Riuz, bud sa ka kol na u N. Williams ha ka minit ba 75 bad sa u D.Olmo uba la ïoh ban thep ha ka minit ba 83, kaba la pynlong syndon ia ka Spain ban pynliem ia ka Georgia da 4-1.
