Ka Tnad ka Koit ka Khiah ka pyrthei hi baroh kawei lem bad ka tnad jong ka Veterinary, ki la buh ia ka thong ban lah ban rad dyngkhong noh ia ka jingpang Rabbies hapoh u snem 2030 ha kaba la pan ruh ia ka jingkyrshan na ki paidbah nongshong shnong ba lah ban pynurlong ia kane ka thong.
Ia kane la pynpaw da u Dr. F. Nongdhar, Medical Officer ka tnad Veterinary, Ri Bhoi District bad u Dr
Benjamin CH Momin, Medical Officer ka tnad District Medical and Health Officer Ri Bhoi District, ha ka jingkren ai jingshai paidbah lyngba ka Awareness Programme kaba la long shibynta na ka jingrakhe ia ka World Rabbies Week ha St. Paul Higher Secondary School, Nongpoh.
Kine ki Medical Officer, ki la pynshai, ba ka jingpang Rabbies ka dei ka jingpang kaba shyrkhei bad kaba lah ban shim wat ia ka jingim ki briew kiba ngat ne bit ia kane ka jingpang hadien ka jingshah dait ha ki mrad ne ki jingri jingdup ha ki iing ki sem jong ki, kaba kongsan eh ka long, ba ki paidbah kiba don ia ki jingri ha la iing ki dei ban leit ai injeksion ne vaccination ia la ki jingri kynthup ia ki ksew bad kiwei kiwei ban iada na kane ka jingpang.
Ki la iathuh ruh, ba ha ka jingrakhe ia ka World Rabbies Day ha ka pyrthei hi baroh kawei, ka tien maitphang ka long, ‘Breaking the Rabbies Boundaries’ kaba mut ban kdiah ne pynkhyllem noh ia u pud ka jingsaphriang jong kane ka jingpang Rabbies, kumta, kum ki ophisar ki la khot la wer ia ki paidbah ban ai ka jingiatreilang ban rad dyngkhong ia kane ka jingpang bad ruh ban nang pynsaphriang ia ka khubor halor ki jingma ba shyrkhei jong kane ka jingpang Rabbies.
