Ka Myntri ba dei khmih ia ka tnad jong ka koit ka khiah ka sorkar jylla, ka Dr. Mazel Ampareen Lyngdoh hynnin ka sngi,ka la ong ba ka sorkar jylla kan iai buddien bad ka sorkar kmie ban pynbna noh ia ka North Eastern Indira Gandhi Regional Institute of Health and Medical Science (NEIGRIHMS) kum kawei na ki shlem treikam kaba kongsan ha ri lane kata ka Institute of National Importance (INI) kumba long lem ka All India Institute of Medical Sciences (AIIMS) bad kiwei kiwei de.
Ka Dr. Ampareen ka la iathuh ba ka kynhun jong ka tnad ka koit ka khiah ka sorkar jylla ha ka taiew ka ban sa wan, kan sa leit sha ka nongbah New Delhi ban kynduh ia u myntri ka sorkar kmie ba dei khmih ia ka koit ka khiah, u JP Nadda bad na ka liang ka jongka kan sa rah ban iakren ia kane ka mat bad kiwei kiwei ki jingdonkam ha katei ka jaka sumar bad utei u myntri ka sorkar kmie.
Kiwei de ki mat kiba ka sorkar jylla kan sa rah sha utei u myntri ka sorkar kmie, ki kynthup ruh ban sdang pyntreikam noh ia ka Cancer Research Center ha katei ka jaka, ka jingpynmang khambun ki seat ha ka kyrdan pule Post Graduate na ka bynta ki doctor ka jylla bad ka jingmih jong ki doctor na ka jylla ban leit trei sha kiwei pat ki jylla nalor kiwei kiwei de ki jingdonkam jong ka jylla kiba iadei bad ka tnad jong ka koit ka khiah.
