Shillong, Lber 15: U Myntri rangbah ka jylla Meghalaya, u Conrad K. Sangma mynta ka sngi u la shah jied biang kum u National Presdient ka party National People’s Party (NPP), ha ka elekshon jied nongkitkam ba thymmai ba la pynlong ha Constitutional Club of India, ha Nongbah Delhi.
U Myntri rangbah ka jylla, u Conrad K. Sangma u la shah jied biang kum National President ka NPP party na ka bynta ka samoi treikam jong u snem 2025-2028 khlem don don kino kino kiba iakhun pyrshah ia kane ka post National President.
U Myntri sorkar barim bad u State working President ka Arunachal Pradesh u Paknga Bage u la shah jied kum u General Secretary khlem da don ba ialeh pyrshah bad ka Dr. Mehtab Agitok Sangma kum ka National Treasurer.
Ha kane ka elekshon, u State president ka NPP u Bah Prestone Tynsong bad u State President ka NPP na Manipur u Joy Kumar Singh, ki la shah jied kum ki National Working President ka NPP. Ha kane ka sngi, ki la jied ruh ia u James K. Sangma, General Secretary barim ka National NPP kum u National Working President.
Na ka liang u Myntri rangbah ka jylla Meghalaya bad u National President ka NPP, u Conrad K. Sangma u la pynbna ruh ba ia kiwei ki dkhot ka National Committee 2025-28 ka party shen kan sa pynbna paidbah.