Khliehriat, Jylliew 15: Ka Kong Bindas Syiem, ka longkmie na Ri Bhoi bad kaba la paw halor ka jingshah thngan ha Nongbah Shillong, ban dawa na ka sorkar ba ka dei ban shna noh ia ka surok na Nongpoh sha Umden, mynta ka sngi ka la poi Khliehriat, na bynta ban leit ai jingkyrshan ia u Bah Marshall S.B. Biam, President Jaintia Coal Owners, Miners, Suppliers & Workers Association (JCOMSWA), uba la shah thngan ba khlem buh por, na bynta ban dawa ia ka sorkar jylla, ba ka dei ban ailad noh ia ka kam tih dewiong ha ki jaka kiba don ha Ri Lum Jaintia.
Ha katei ka sngi, ba ka Kong Bindas Syiem, ka la leit ban ai jingkyrshan ia u Bah Marshall S.B. Biam, ka la iohlad ruh ban kren, ha kaba lyngba ki jingkren jong ka, ka la pynpaw da kaba ong, ba ka sngewsynei ia kiba shah thang bad kiba dawa ia ka hok, ka la pynkynmaw ruh ia ka por ba ka ka la shong shah thngan hajan ka Additional Secretariat shillong, ha kaba ka la ong ba ha katto ka por ka khlem sngewthuh shuh ia ka jingtlot ka met ka jong ka hynrei da ka bor u Blei u la ai ia ka bor bad u khlem ieh noh ia ka naduh kaba sdang haduh kaba kut ha ka jingshah thngan ka jong ka.
Kumta ka Kong Bindas Syiem, ka la kyntu ia ka sorkar jylla, kata naduh ia Conrad K. Sangma, Myntri Rangbah, nangta ia u Bah Prestone Tynsong bad ia u Ma Sniawbhalang Dhar, kiba long kum ki Symbud Myntri Rangbah, ba kin sngap lem ia ka jingdawa jong katei ka kynhun, kiba la dawa na ka sorkar ba ka dei ban ailad noh ia ka kam tih Dewiong ha Ri Lum Jaintia.
Ka Kong Bindas Syiem, ka la pynpaw ruh ba kumba ka long mynshwa ha ka por ba dang iaid ka kam tih Dewiong, ki shnong ki thaw ha Ri Lum Jaintia, hynrei wat ha Ri Bhoi ruh, ki iphuh iphieng bad ki paidbah ruh ki biang ka kam ka jam, hynrei kumba ka long mynta naduh ba khang ka kam tih Dewiong, la hiar lut ka ioh ka kot bad ki briew ki la im ha ka duk ha kyrduh.
Sa peit ruh
