Nongpoh, Jylliew 25: Uwei u briew na ka shnong Tyrso Pdeng, ia uba la tip kum u Teibor Mangu, uba la jah nala ing naduh ka janmiet jong sngi Nyngkong, u la leit ban phasi ialade da kaba pyndonkam da u tyllai plastic ha kawei ka khlaw kaba don ha Lumshnong Tyrso.
Ia ka met jong utei rangbah uba don kumba 29 snem ka rta, la lap noh da ki bahaing bad ki briew kiba la pynlong ia ka jingleit wad ia utei u rangbah mynta ka sngi.
La iathuh ruh ba utei u rangbah, udei uba don jingduna ha ka bor pyrkhat pyrdain naduh ka rta kaba dangrit.
Na ka liang ki pulit ka Mawlasnai Outpost, ki la pynkit noh ia ka met jong utei u rangbah Nongpoh Civil Hospital na ka bynta ban pynlong ia ka post-mortem examination, hynrei ki bahaing ki la kyrpad ban pyllait naba kim don ka jingsuba sniew halor katei ka jingphasi utei u rangbah.
Na ka liang u majistor ka Ri Bhoi, u Bah AL Myrthong, u la pdiang ia katei ka jingkyrpad jong ki bahaing bad hadien ka jingpyndep ia ki jingdonkam katkum ka ain, la aiti noh ia ka met jong utei u rangbah sha ki bahaing hasem ba kin pyndep ia ka jinglehniam kaba khatduh.
