Nongpoh, Lber 18: U MLA ka Nongpoh Constituency, u Bah Mayralborn Syiem, ryngkat bad ki ophisar na ka tnad pynmih bad sam bording, u la leit ban jurip ïa ka jingtei ïa ka 132 KV Sub-Station kaba don ha Umlyngkdait, Nongpoh, ban pyntikna ba ka jingpyntrei ka ïaid beit bad ban pynthikna ruh ba yn lah ban pyndep ha ka por ba la buh.
Haba kren sha ki lad pathai khubor, u Bah Mayralborn Syiem u la pynpaw ba kum u nongmihkhmat paidbah u thrang ban ïohi ba kane ka jingtei kan ïaid sted bad kan long katkum ba la buh. U la ong ba ka jingwan jurip jong u ka long ban peit bniah ïa ka jingpyntrei, ban pynthikna ba kam don kano kano ka jingduna bad ban pynbeit kloi lada don kino kino ki jingeh kiba lah ban pynslem ïa ka kam.
U la ong ruh ba kane ka Sub-Station kan long ka jingkyrkhu kaba khraw ïa ki paidbah ka thaiñ Nongpoh bad ki shnong ba marjan, namar kan ïarap ban pynduna ïa ka jinglip light khah khah bad ban pynjanai ïa ka jingsam bording. Ka jingïoh bording kaba biang kan ïarap ruh ïa ka roi ka par ha ka liang ka khaïi pateng, ka pule puthi bad kiwei kiwei ki bynta jong ka imlang sahlang.
Ha kane ka juh ka sngi, u Bah Mayralborn Syiem u la leit ruh ban jurip ïaka jingpyntrei ïaka Urban Sub-Center jong ka Nongpoh kaba don haka Shnong Umlyngkdait ban pyntikna ba ïa kane ka Sub-Center yn lah ban pyntreikam noh khnang ba kan pynsuk ïaki paidbah Nongshong Shnong jong ka thaiñ Nongpoh.
Ha kane ka bynta, u Bah Mayralborn Syiem u la ong ba kane ka Urban Sub-Center kadei kum shibynta ban pyntikna ba ki program bapher bapher jong ka sorkar pdeng bad sorkar Jylla kin lah ban pyndep lyngba kane ka center hakaba ia dei bad ka koit ka khiah kiba kynthup naduh ka Jingsumar iaki Paidbah khamtam iaki Longkmie kiba armer, ka jingai dawai bad injection ïaki khyllung lem bad kiwei kiwei.
U MLA u la iathuh, Kane ka Sub-Center kadei kaba la don lypa haka Shnong Ïew-Mawlong dakaba shong wai haki jaka Shimet ia kaba mynta la lah ban tei pat daka building kaba thymmai haka Shnong Umlyngkdait haka jaka GAD kaba dei ka jaka jong ka Government bad kane ka Sub-Center kan ai ka jingshakri sha ki 21 tylli ki Shnong jong ka thaiñ Nongpoh.
