Nongpoh, Lber 17: Tang hadien ba bun ki longïing ki la shah pynjot bad shah pynjulor ha ka eriong ha ka miet jong ka sngi Nyngkong jong ka taiew, u MLA ka Jirang u Bah Sosthenes Sohtun mynta ka sngi u la khot syndon da ka jingialang kaba kyrkieh ia Ki BDO ka Jirang bad Umling C&RD Block na ka bynta iban ia kren halor ka lad ban pynsted ia ki jingiarap naka bynta kito ki Lanot ba la shah ktah ha ka eriong.
Ha kane ka jingialang la shim bynta lang u BDO ka Jirang u Dr. Hajong bad ka BDO ka Umling C&RD Block ka Ayushi Pradhan, kiba la pyntip hakhmat u MLA halor ki ing ki sem bad ki shnong kiba shah ktah ha katei ka eriong bah.
Na ka liang kitei ki BDO ki la pynsngew ruh hakhmat u MLA ba kane ka jingshah jurlor ki longing longsem ka dei naduh ka jingjur ka eriong bad u lapbah ba ther bad ki la pyntip ruh la don kito ki longing kiba la shah ktah jur ki la ioh ka jingiarap ba mardor naduh u khaw, ki jain blanket bad ki tin soping ha kaba mynta ki dang ap shuh shuh ia ka jingpyntip na bynta kito ki longing kiba ym pat ioh ia ka jingiarap.
Ki la kular ruh hakhmat u Myntri sorkar bad MLA ba kin dang pynsted ka jingjurip bad ki lad ai jingiarap na ka bynta kito kiba la shah ktah jur bad shah lynshop ha katei ka eriong.
Ha kane ka sngi, na ka liang u Bah Sosthenes Sohtun kum u MLA bad u myntri sorkar ba dei peit ia ki kam ka tnad pynroi, u la ai khublei kyrpang ia ki BDO bad ki ophisar kiba la shim khia ban leit jurip ia ki longing ba la shah ktah bad ruh ban pysnted ia ki jingiarap na ka bynta kito ki longing kiba la shah ktah jur.
U la iathuh ruh kum u MLA u la shim khia ban phah pynpoi mardor ia ki tin soping sha kito ki ïing kiba la shah ktah jur bad ruh ryngkat kiwei kiwei ki jingiarap kiba donkam na ka bynta kito ki lanot kiba la shah lynshop jur ha ka eriong.
Shuh shuh, u Bah Sosthenes Sohtun u la kyrpad iaki dorbar shnong ba ki dei ban pyntip sha ka ophis ki BDO lada ki shah ktah ha kane ka bor mariang bad kyntu jur ruh ba kin long kiba peitngor bad ruh ba kim dei ban mih na laing haba jur slap ne jur ka eriong.
