SHILLONG, MAR 18: Ka Deborah Marak, Working President jongka seng Congress haka jylla kala ther jur iaka sorkar jylla halor ka jingpynduh Internet kaba shitaiew lynter ha ri lum Garo kaba la wanrah iaka jingeh shikatdei ia ki kam khaïi pateng, ki khynnah skul, ka koit ka khiah, ki bank bad kiwei kiwei bad byrthen ba dei ban pyn-im biang mardor iaka internet khlem sa pynduh shuh ha ki por ban dang wan.
‘Nga dang shu ioh jingtip myntan ba ki la pyn-im biang iaka internet’ la ong ka Deborah da kaba bynrap ba ha kum kane ka juk kaba mynta, yn nym lah satia ban leh eiei khlem ka internet bad kala dei ka jingdonkam kaba hakhmat eh.
Ka Deborah kala ong ruh ba ki nongkhaïi ha Tura, Williamnagar, Baghmara bad ha North Garo Hills ki la mad iaka jingduhnong kaba khraw naka jingthut haka kam siew pisa pilain bad shalan ia ki mar ki mata, katba ki khynnah skul pat ki hap ban duh iaki online klas bad ki jingtip kiba iadei ba ki eksamin ki jongki.
Kala ong ruh ba ka sngewthuh eh haba don kano kano ka jingthut haka shongsuk shongsain ban khang iaka internet kumba da ki kynta ne katto katne sngi, hynrei ban shu khang sah palat taiew kala long kaba palat bad kane ka buh dak jingkylli kaba khraw iaka synshar khadar.
Shuh shuh, kala ong ba ka jingbteng ia ka jingkhang internet kadei ka bym lah satia ban pdiang naba ka ktah jur iaki paidbah ba lui lui bad ba kam dei satia ban jia haka jylla Meghalaya bad kyntu iaka sorkar ba kum kine ki jingleh kimdei shuh ban dang jia biang haki por kiban dang wan.
