Nongpoh, Lber 17: U Myntri ka sorkar jylla ba dei peit ia ka tnad C&RD bad u ba dei ruh u MLA ka Jirang mynta ka sngi u la pynher iaka lama jong ka Don Bosco Higher secondary school Byrnihat kum ka dak ka jingplie pyrda iaka jingrakhe ia ka jubili ksiar ka jingiaid lynti kaba 50 snem bad ruh ka lympung ialehkai sport katei ka skul ba la pynlong ha Madan jong ka skul.
La pdiang burom ia u Bah Sosthenes Sohtun kum u kongsan da u Fr. Renny V.P, Ki sister jong ka SMII, naka liang ka sport u bah Jeff warlarpih, u Principal ka skul u Fr. Gregorious Syntem, ki nongialam skul bad ki nonghikai ka Donbosco, ha ryngkat ka jingpput jingtem haka por ba pdiang burom ia u kongsan.
Hakane ka sngi plie la pynphuh pynphieng da ka jingshad tynrai jong baroh ki jylla jong ka North East ba la shim bynta da ki khynnah skul ,ka mass drill, bad ki wei kiwei kaba la pynshoh biej bha haka ne ka sngi ka long iaka jingput jingtem da ka music Band jong ka skul kaba la pynihun iaki ba peitkai.
Hakane ka sngi naka liang u MLA u la thang iaka sharak ban pyni ia ka dak ba la plie ia ka jingrakhe ia ka Jubili Ksiar bad ruh iaka lympung ialehkai sport bad la thang ruh ia u mombati jong ka jingieid, bad la pynkut iaka ne ka sngi da ka jingsam iaka khusnam sha ki house captain ki ba jop haka jingiaid march pass.
Naka liang u Bah Sosthenes Sohtun haba kren u la ai khublei iaki nongseng jong ka ne ka skul ki ba la seng naduh u snem 1977 bad ki ba la lah ban pynmih shibun ki riew stad nakane ka skul ha kine ki 50 snem ka jing iaid lynti ka jong ka, bad u khmih lynti ruh ba nangne sha khmat kin dang lah shuh shuh ban ai ka jing shakri sha ki khynnah ki ba wan ban pule hakane ka skul bad kin sei shuh shibun ki riewstad bad ki riew shemphang na kane ka skul.
