Nongpoh, Jylliew 07: Mynta ka sngi ka la don ka jingialang paidbah hapoh ka shnong Baridua na ka bynta ban ia kren halor ka kam rangbah Shnong, ka shnong kaba hap hapoh ka Raid Marwet ha Ri Bhoi bad ha katei ka jingialang, la donlang da ki Rangbah, Samla bad Longkmie, ha kaba lyngba katei ka jingialang, ka la long kaba khluid eh bad kaba la pynlong ia u Acting Rangbah Shnong bad ka Executive Committee kim lah ban shim ka kano kano ka rai bad ha kaba kut, ki la phah noh ia ka rai jong kane ka jingialang sha ka Hima Mylliem ban shim ia ka rai kaba khatduh.
Ka mat kaba Kongsan eh ha katei ka jingialang, ka long ba kyntu ia u Acting Rangbah Shnong lem bad ka Executive Committee jong u, ba ki dei ban pynlong noh ia ka jingiajied paidbah ia u Rangbah Shnong, namar kumba ka long haduh mynta, la kumba 7 snem eiei ba ka shnong Baridua, la shu peit bad synshar beit da u Acting Rangbah Shnong bad khlem da don shuh kata ka jingiajied paidbah ia u Rangbah Shnong.
Kaba la pynkhluid eh ha katei ka jingialang, ka dei hadien ba la mih ar-kynhun, kata kawei ka kynhun kaba kyrshan ban neh beit u Acting Rangbah Shnong kum u Rangbah Shnong ba pura, hynrei kawei pat ka kynhun ka kwah ban don noh da ka jingiajied paidbah, na bynta ban ïoh ia u Rangbah Shnong ba pura hapoh katei ka shnong.
Hadien ba la kut katei ka jingialang, ki riew rangbah hapoh katei ka shnong, ki la ong ba ba ha katei ka jingialang kim lah ban shim ia kano kano ka rai tang hapoh ka shnong, hynrei kaei ka jingiakren ne iatai hapdeng ki paidbah hapoh ka shnong, ki la rai ban phah sha Hima Mylliem, khnang ba kan ïoh ban leh ia kaba donkam baroh.
Shuh shuh, ki la ong ruh ba lyngba katei ka jingialang paidbah, kiba bun na ki paidbah ki la kwah ban pynlong da ka jingiajied paidbah, na bynta ban ïoh ia u Rangbah Shnong ba pura hapoh katei ka shnong.
