Nongpoh, Jylliew 07: U Myntri rangbah ka jylla Assam, u Himanta Biswa Sarma u la kyrpad syndon na u myntri Rangbah ka Mehalaya ban pynlong ïa ka jingtohkit kaba khuid bad kaba bniah khlem da leh shiliang halor ka jingïap kawei ka samla na Assam kaba dang 25 snem ka rta ha ka jingïatyngkhuh kali kaba la jia ha Shangbangla, Ri Bhoi District.
Kum ba pynkynmaw, kane ka jingjia ka la jia ha ka 4 tarik u Jylliew 2025 dang step phyrngap kata ha ka por 4.44 baje mynstep, ha kaba kawei ka Kali Hyundai Alcazar kaba don ïa u number AS 01 EV 9578 ka la leit ban tynrah ïa kawei ka Trok ba dang ieng harud surok ha ka jingpyrshang ban knieh ïaid shakhmat ïa kawei ka Kali, kaba la wan rah ka jingjia ba sngewsih haduh ba katei ka Samla ba la tip kyteng kum ka Namrita Borah, 25 snem ka rta ka la duh noh ïa la ka jingim.
Kumba la ioh lum jingtip na ki Pulit ka Ri Bhoi, la ong ruh ba ïa katei ka Kali Hyundai Alcazar la niah da u MD Ismail Hoque Choudhury, 33 snem ka rta na Haripur, Darang District, Assam bad kiwei kiba la ïa don lang ki kynthup u Anyatul Watus, 39 snem ka rta na Guwahati, ka Gayatri Borah, 25 snem ka rta na Mangaldai, Assam, ka Pragya Dihingia, 29 snem ka rta na Sonari, Choraidu, Assam, bad u Meriganka Borah, 26 snem ka rta na Golaghat, Assam.
Dei halor kane ka jingjia, u Myntri Rangbah ka jylla Assam, u Himanta Biswa Sarma, kumba u la pynpaw ha ka rynsan social media lyngba ka X, u la buh ka jingkyrpad ïa u Myntri Rangbah ka jylla Meghalaya u Conrad. Sangma ba un shim khia lem ïa kane ka kam ban phah tohkit bniah bad ban nym don kano kano ka jingleh shiliang, ha kaba kaba ki bahaing katei ka samla bad kiba bun ki nongshong shnong na ka Assam ki la pynsngew ïa u halor kane ka jingjia ba dei ban tohkbniah khnang ba kan nym don kano kano ka jingleh shiliang khmat.
