Kular U MLA ban shim khia ban kyntiew kyrdan na ka Sub Centre sha ka PHC
Nongpoh, Jylliew 05: U MLA ka Mawhati Constituency u Bah Charles Marngar mynta ka sngi u la leit syndon ban jurip kynsan kynsan ïa ka Health Sub Centre kaba don ha ka Shnong Sohnidan, kaba dei hadien ka jingujor jong ki nongïalam Shnong bad ki paidbah ba ki don shibun ki jingduna ha katei ka jaka ai jingsumar bad da lade u la leit ban jurip ban tip ïa ka jingshisha kumba la ujor da ki paidbah.
Haba leit jurip mynta ka sngi ïa katei ka jaka ai jingsumar la synran lang ruh da u Rangbah Shnong u Bah Wonder Khymdeit bad u Secretary Shnong u Bah Kitboklang Dorbar ryngkat kiwei ki riew rangbah.
Kumba la pynpaw da u rangbah Shnong, ki jingduna kiba hakhmat eh ka dei ka surok khyndew ban leit sha katei ka jaka ai jingsumar, ka jingbym biang ka umbam ka umdih, ka jingbym biang ki jaka shong haba wan shim dawai ki nongpang, ka jingbym biang ka bor ding ilektrik, nalor kiwei kiwei ki jingduna kiba dang donkam ban pynbit pynbiang ïa katei ka jaka ai jingsumar.
Ha kane ka jingjurip la pynsngew ruh ba la donkam ban kyntiew kyrdan noh ïa katei ka Health Sub Centre sha ka Primary Health Centre, ha kaba kane ka jaka ai jingsumar ka ai ka jingshakri haduh 14 tylli ki shnong ba la kot ka jingbun paid sha ka 8 hajar ngut bad katba ki Health sub Centre kiba don ka jingbun paid tang 3 hajar ki la ioh ban kiew kyrdan sha ka PHC.
Haba kren pat na ka liang u MLA, ka la long ka jingkmen ia ki nongïalam shnong bad ki paidbah, namar hadien kane ka jingjurip, u Bah Charles Marngar u la kular ban shim khia khamtam ban siang rong noh ïa ka surok ba pynïasoh sha ka Health Sub Centre kaba don tang kumba 300 meter na ka surokbah bad kumjuh ruh u la kular ban shim khia halor ka jingdawa kyntiew kyrdan na ka Health Sub Centre sha ka PHC bad nalor kitei kiwei kiwei ki mat ba la pynpaw sha u kum u nongmihkhmat ka Mawhati Constituency.
