Nongpoh, Jylliew 06: Na ka jingrakhe ïa ka Ri Bhoi Foundation Day ha ka 4 tarik u Jylliew 2025 ha ki ar tylli ki Shnoing kata ha Korhadem bad ha ka Snong Khweng ban kynmaw burom ïa ka jingiaid lynti ba 33 snem ka Ri Bhoi District naduh ba la ioh la ka jong ka District ba pura, ka la don ka jingpynpaw na ka Shnong Korhadem kin sa pynpaw pyrthi ïa kata ka sap kyrpang ki nongthain jain ha kaba ïa dei bad ka jingthaiñ ïa ki jaiñ Ryndia.
Kane ka prorkam ka dei ruh shi bynta ban ai jinghikai ïa ki samla ba kin tip ïa kita ki lad ki lynti ban kyntiew ïa ka ioh ka kot lyngba ki kam seng jam lajong, ha kaba ïa kane ka prokram ka la pynlong da ka jingïatrei lang ka National Commission for Women, New Delhi lem bad ka Step Phyrngap Integrated Cooperative Society, Ltd Thynroit, ka Korhadem Handloom & Weavers Cooperative Society Ltd, ka Eri Spinning Dyeing-cum- Traditional Dress Making Cooperative Society Ltd, Khweng, ka Dorbar Shnong Korhadem, Ki Self Help Groups, ka Village Organisation & ki longkmie kiba dei na ki shmong kiba marjan.
Ka Kong Delina Khongdup, kaba dei ka member ka National Commission for Women, ka la wa ban shim bynta kum ka kongsan bad u Dr. Evarist Myrsing, State General Secretary ka BJP kum u symbud kongsan bad la sakhi lang ruh da ka jingdon lang ka Kong F. Sun, District Social Welfare Officer, Nongpoh lem bad ki longkmie longkpa, ki khun samla bad ki nongthain jain ryndia na ki Society bapher bapher.
Haba ai jingkren ha kane ka sngi, naduh ka Kong Delina Khongdup, u Dr. Evarist Myrsing bad kiwei kiba la ai jingkren ki la pynpaw ïa ka jingsarong halor ka jingpaw katei ka thaiñ ha kim thain jain ryndia bad kane hi ka paw ba lada ngi lah ban kyntiew ïa ka kam thain jain ka la long kawei na ka lad seng kam seng jam lajong ne ka lad ka lynti ban kyntiew ïa ka ioh ka kot lyngba ki kam lajong.
Kawei na ka mat ba ki la ïa kren ha kane ka sngi, kaba ai mynsiem ïa ki nongthain jain ryndia, ka dei ka jingbuh thong ba na ka Shnong Korhadem kin sa pynpaw pyrthei ïa ka sap thain jain ryndia sha Nongbah Delhi bad ki la ïa kren ruh ban don kata ka jingïatrei lang na ka bynta ban kyntiew ïa ka ioh ka kot ki nongthain jain lyngba ka sap kyrpang ba ki don ha ka kam thain jain bad khamtam ban thain ïa ki jaid ryndia kiba la paw bha ha ka jylla, ka ri bad ha ki ri ka pyrthei.
