Nongpoh, Jylliew 21: Ka Dorbar Shnong Saiden mynta ka sngi ka la ioh ban plie paidbah noh ïa kawei ka jingkieng ïaid kjat paidbah ïa kaba la shna ha ka dong Lad Iewsier da kaba mang pisa na ka Dorbar Shnong ha ka jinglut kaba la kot sha ka 1 lak tyngka.
Ïa kane ka jingkieng ïaid kjat, la tei kyrpang ban pynsuk ïa ki paidbah nongshong shnong khamtam ki khynnah skul kiba hap ban ïaid ban ieng lyngba katei ka bynta kaba hap ban ïaid najrong ka wah Umpyrli kaba ksam lyngba ka shnong Saiden ha ka Dong Lad Iewsier.
La plie paidbah ïa kane ka jingkieng ïaid kjat, da u Bah EK Lapang, Rangbah Shnong, ha ka jingïadonlang u Bah EJ Myrthong, Secretary Shnong nalor ki dkhot ka Executive Committee lem bad ki nongshong shnong.
U Bah EK Lapang u la pynpaw, ba kum ka Dorbar Shnong hi, ka la iohi ïa ka jingeh ki paidbah nongshong shnong ha katei ka dong Lad Iewsier khamtam ki khynnah skul kiba hap jam lyngba katei ka bynta nalor ka wah Umpyrli bad baroh shikatta ki hap ban ïaid lyngba ka jingkieng ba la shu shna da ki dieng bad ki siej kaba la buh jingeh shikatdei ïa ki.
U la ong ruh, ba dei halor kane ka jingeh bad ka jingma kaba lah ban ktah ïa ki nongleit nongwan, na ka liang ka Dorbar Shnong ka la rai hi ban mang ban tei da ka jingkieng kaba paka ïa kaba la shna da ki nar rod bad kaba la pynitynnad ruh ïa katei ka jaka ha kaba ïa ka pisa la mang hi na ka Dorbar Shnong ha kaba ka jinglut kam jin shuh sha ka 1 lak tyngka.
