Tang hadien ba ka samoi treikam jong ki nongïalam bad ki dkhot barim jong ka FKJGP Nongpoh Circle kala kut noh, ki nongïalam naduh sengkmie bad ka North Khasi Hills District mynta ka sngi kila pynskhem biang ïaki nongïalam ba thymmai ki ban kit ban bah ïaka lyngkor ban shakri ïaka jaitbynriew kum ki shipai ka seng FKJGP haka jingïalang kaba la long ha District Library ha Nongpoh.
Ki nongïalam ba hakhmat jong ka FKJGP Nongpoh Circle naka bynta ka samoi treikam jong u snem 2025-28 bala pynskhem mynta ka sngi ki kynthup ïa u Samla Precious Khymdeit kum u President, George Weston Lyngdoh Vice President, Babitnamhiam Pamshong General Secretary lem bad kiwei kiwei.
Ïa kitei ki nongïalam ba thymmai jong ka FKJGP Nongpoh Circle la wan ban pynskhem bad pynbamsmai da u Bah Eldie N Lyngdoh General Secretary ka FKJGP sengkmie, haka jingdonlang u Bah Elton Cliff Warjri Senior Vice President ka sengkmie, Bah Luistar Lyngdoh President ka FKJGP NKHD, u Bah Ricky Majaw General Secretary bad kiwei kiwei ki nongïalam bad ki dkhot ka seng.
U Bah Eldie N Lyngdoh haba kren ha katei ka sngi kum u kongsan u la ong ba kum ki dkhot ka seng kim dei ban rung sha ka seng da ka jingthmu kaba sniew bad kaba pynthohbria ïaka seng hynrei ban long ki dkhot kiba sngewrit namar ka FKJGP kam ju hikai bakla ïaki dkhot ban shim ïaka kyrdan nongïalam bad ban iaid pynheh shadem, hynrei ban long ki dkhot kiba shakri da ka mynsiem kaba khuid ban ban long kiba khreh haba don kano kano ka thma ne ka jingïaleh naka bynta ka dawbah jong ka jaitbynriew, namar kum ki dkhot kim dei ban tieng ïaka iing byndi hynrei ka thong hi ban bha ban suk ka jaitbynriew bad ka pateng ban wan.
