Uwei u rangbah naka shnong Ummar haka thaiñ Western Ri-Bhoi u la jah rngai khlem wanphai iing shuh la kumba 5 sngi mynta kaba la buh ruh ïaki bahaiing bad ki paidbah nongshong shnong hapdeng ka umdum namar haduh mynta kim don jingtip shano u leit bad u don.
U tei u rangbah ba jah la tip kyrteng kum u Carlus Tron ba ju khot ieid ruh kum u Jack bad katkum ka jingïathuh jong ki bahaiing kila ong ba haka 11 tarik mynta u bnai u la leit buh ïala ka lok kaba dang armet ban leit kha khun ha Ganesh Das Hospital ha nongbah Shillong hynrei ha katei ka juh ka sngi u la thmu ban leitphai biang shala shnong, hynrei namar ka jingbym ioh kali shuh bala dei ka por janmiet, naka liang u tei u rangbah u la phone ïa u Bah Youngmind Makri u ba dei u Secretary Shnong ka Ummar ban phah wanshaw, hynrei namar ba um lait utei u Secretary Shnong u la phone ban phah leit shaw da ki paralok, bad wanphai ryngkat bad la ka jong ka kiaw kurim.
Ynda poi ha Umran utei u rangbah u la phah sangeh syndet ïaka kali harud surok da haka por kumba 8 duna eiei da kaba ong ruh ba u kwah ban leit shabar, hynrei naduh katei ka por utei u rangbah u khlem wanphai shuh haduh ba kila ap kham slem, kaba la pynlyngngoh ruh ïaka kiaw kurim bad kitei ki paralok ba leit lang.
Kitei kiba don lang ha katei ka kali kila pyrshang ruh ban leit peit ha katei ka jaka ba u leit shabar hynrei ki khlem lapdien satia ha kaba kila leit ban pyntip noh mar mar sha ki pulit jong ka Umsning Police Station.
Shuh shuh naka liang ki bor shnong jong ka Ummar naduh katei ka sngi bad haduh mynta ka sngi kila mih paidbah ban leit wad ïa utei u rangbah ha katei ka jaka ba u jah hynrei ki khlem lapdien satia ha kaba kila kyrpad ruh ioh don kino kino kiba iohi ba kin pyntip sha ki pulit kiba hajan eh jong ki.
Ki bahaiing jong utei u rangbah mynta sngi kila leit ruh ban buddien ïaka ejehar bala ujor ha Umsning Police Station, hynrei naka liang ki pulit ki dang pynlong ka jingtohkit bad ki dang ïaleh ban wad bad ban lapdien ïa utei u rangbah.
