Nongpoh, Lber 09: Ban nym duh jaid ki dawai tynrai bad ban dang pynkhlain ia ki rukom sumar tynrai tang da ki dawai kymbat ba ioh na rilum Khasi-Jaintia, ka Dr. Philing Myntoilang Herbal Care Society ha ka sngi Saitjain ka la pynlong da ka jingiakynduh lang jong baroh kito kiba sumar tynrai bad ruh kito kiba la ioh jingkoit na ka jingsumar lyngba ki dawai kymbat.
Ia kane ka jingiakynduh lang la pynong ha Madan Umsning ha kaba la don ryngkat lang u Chairman ka Umsning Town Durbar u Bah Rocky Kylla, u Dr. Philing Rynjah bad kynthup kiwei kiwei ki nongsumar tynrai na kylleng ka ri Khasi Jaintia.
Ha kane ka sngi, la don ruh kito kiba la wan ban phla paidbah ba ki la ioh jingkoit na ka jingsumar tynrai lyngba ki dawai kymbat bad ka jingsumar tynrai ia ki jaid jingpang bapher bapher kaba dei tang lyngba ka jingsumar tynrai da ki dawai kymbat.
Ki jaid jingpang kiba ju sumar tynrai kumba la pynpawha kane ka sngi ki kynthup naduh ka jingpang maw ha u khyllai, ka jingpang iap shiliang, ka jingpang stem, ka jingshah dait bsein, ka jingshah dait ksew, ka jingpang bampong, ka jingkhuit ding, kiba pang dap lyer, ki jingpang ba mih khniang ha ka met bad kiwei kiwei.
Ha kane ka sngi, na ka liang ka Dr. Philing Myntoilang Herbal Care Society, ka la sam ruh ia ki symbai dawai kymbat sha kito ki nongsumar tynrai kiba ju sumr ia kitei jaid jingpang bapher bapher. Kane ka jingpynlong ia kane ka jingiakynduh lang ruh ka long kawei na ka thong ba lyngba katei ka Societyki angnud ban pynneh pynsah ia ka rukom sumar tynrai bad khamtam ban iada kyrpang ia ki dawai kymbat bapher bapher ba la ban ioh na kane ka rilum Khasi-Jaintia.
