Nongpoh, Lber 09: Ban shngaiñ ki paidbah ha ka leit ka wan bad ban pynduna ia ki jingjia ba sngewsih kiba ju jia ha ki surokbah ha Ri Bhoi, ki Pulit ka Ri Bhoi ym tangba ki ai jinghikai ia ki nongniah jong ki Kali saw shaka ne ar shaka, hynrei ki bteng ruh ban khynra ia ki kali ba pynkhein ain bad kito kiba pynkhein ain ki hap beit ban siew ia ka kuna katkum ki kyndon jong ka ain.
Haba tehalakam ia ki kali kiba pynkheiñ, ki Pulit ka Ri Bhoi mynta ka sngi u Blei ruh ki la bteng ban khynra ia baroh ki kali paidbah kiba iaid ba ieng lyngba ka surokbah National Highway ha Ri Bhoi. Kane ka jingpyrkhing bad ka jingkhynra ia ki Kali la pynlong naduh na Byrnihat Police Station, Umsning Police Statioin, Umiam Police Station bad ka Khapmara PIC.
Kumba la ia thuh da ki bor pulit, ha kane ka jingkhynra ia ki Kali ba pynkhein ain ba kynthup naduh ki Kali saw shaka bad ki kali ar shaka, ki pulit ym tangba ki la pynngewthuh ba ki hap ban bud ia ki kyndon ain niah kali, hynrei kito kiba pynkhein ain ki la shah dain kuna ruh katkum ki kyndon jong ka Motor Vehicle Act.
Kane ka jingtehalakam ia ki kali paidbah ki kynthup naduh kito kiba ym deng ia u seat belt, kiba dih buaid, kiba pynher sted ia ki Kali bad kiba ym deng Helmet, kaba long ka jingma ym tang ia ki kiba niah ia ki Kali bad kane ka buh jingma ruh ia ki paidbah ba leit ba wan lyngba kane ka surokbah.
