Shillong, Rymphang 09: Hadien ka jingjia ba sngewsih ba haduh 27 ngut ki mynsiem ba kordor ki la duh ia la ka jingim na ka jingbthei kynsan ka par dewiong beain ha Mynsngat East Jaintia Hills, u Symbut Myntri ka sorkar jylla bad uba dei peit ruh iaka tnad ka kam pohïing u Bah Prestone Tynsong mynta ka sngi u la ong ba ka sorkar jylla ka la leh syndon da kaba tyngeh ban pynduhjaid ia ki par dewiong beain ha ka jylla Meghalaya.
Haba kren sha ki lad pathai khubor mynta ka janmiet u Bah Prestone Tynsong u la ong ba ka sorkar jylla ka la dep ruh ban hukum ia ka bor synshar District ka East Jaintia Hills ba ka hap ban pynthikna baroh bar ki par dewiong beaiñ ki dei ban sangeh bad ban leh da kaba tyngeh.
U la ong ruh kaei kaba la jia halor katei ka jingbthei ka par dewiew la dep ban leh tyngeh katkum ki kyndon ain bad ka sorkar ruh ka la pyrkhing ruh ban don ki par dewiong beain, hynrei kine ki jingjia ki jia sha ki jaka ba kyndong ha kaba wat ka surok ruh ka long kaba khohruh khohram ba wat ki bor pulit ruh ki shem jynjar ban poi sha katei ka jaka. Wat la katta ruh ka sorkar kan nym map iano iano ruh kiba tih dewiong beain bad halor katei ka jingjia la dep ban kem ia ki briew ba don kti bad ruh la leh da kaba tyngeh halor kane ka jingjia kaba sngewsih ban pynshitom ia kito kiba don kti.
Halor katei ka jingjia kaba sngewsih, u Bah Prestone u la ong ruh ba ka sokar jylla hapoh ka shiphew sngi kan ujor da ka Affidavit sha ka ïingbishar ba don burom ka High Court bad u la kyntait ruh ban kynthoh ia kiwei kiwei ki bynta namar ia kane ka kam la tuklar ruh da ka ïing bishar ka Meghalaya High Court ba ka ingbishar kan leh ia kaba donkam.
La dep ruh ban kem ia ki 2 ngut kiba don kti ha katei ka kam bad mynta ruh ki Pulit ki don ha ka jingtohkit ban ioh kem ia kiwei kiwei kiba don kti bad baroh kito ki trai par dewiong kiba pyniaid beian” ong u Bah Tynsong.
Haba kylli ruh halor ki jingduna ki bor pahara ban peit pyrman ia ki par dewiong beain ha ka jylla la ka sorkar ka dang donkam neem ia ki bor pahara na ka sorkar kmie, u Bah Tynsong u la ong ba ia mynta ka jylla ka dang lah ban pyndonkam tang da ki bor pahara ba la don lypa bad wat la katta ruh ka sorkar ka la thmu ban thungkam sa 3000 ngut na ka bynta ki post kiba dang thylli hapoh ka tnad Puliit ka jylla.
U la ong ruh lada la lah ban thung kam sa kitei ki post ba dang thylli, ka sorkar kan dang lah ban pyntreikam ruh tang da ki bor pulit ka jylla haba don kum kine ki jingjia.
Haba kylli ruh halor ka jingdon kumba 22000 ki par dewiong kiba la shu iehnoh khlem pyntreikam la ka sorkar kan buh neem ia ka por ban khang khyrdep syndon, u Bah Tynsogn u la ong ba kum kita ki jingkylli ban buh por kan nym mih satia bad lada don kita ki par dewiong beain la ka dei mynta ne lashai ruh ka sorkar kan khnang beit bad kan iaid beit katkum ki kyndon ka ain.
Shuh shuh, u la bynrap ruh da kaba ong ba ki bor sorkar ki dang bteng ka jingwad ia ki briew ha katei ka jingthei ka par dewiong, ioh lehse dang don kiba dang sahkut bad kumba long haduh mynta ym pat lap satia ia kino kino kiba sahkut hapoh katei ka par dewiong lait noh na kito ki 27 ngut kiba la lap bad kiba la duh noh ia la ka jingim, u la bynrap.
