Nongpoh, Lber 12: Ka Sports Meet ne ka lympung ialehkai ba lai sngi hapdeng ki khynnah skul kiba pule ha skul Umpathaw Presbyterian Secondary School, ka la kut noh mynta ka sngi ha madan ialehkai ka shnong Umpathaw, ka shnong kaba don ha ka thain Umden ha Ri Bhoi.
Ia katei ka Sports Meet Umpathaw Presbyterian Secondary School, kaba la kut mynta ka sngi, la leit ban pynhap pyrda noh da u Samla Toning Lapang, Education Secretary ka KSU, NKHD kum u Kongsan, ha ryngkat ka jingdon ki nonghikai jong katei ka skul, kiba kynthup ia u Bah P. Malai, Headmaster ka skul, u Bah W. Khymdeit lem bad kiwei ki Nonghikai, ki longkmie longkpa bad ki khynnah skul.
Ha katei ka lympung ialehkai Sports ba lai sngi jong katei ka skul, ki khynnah kiba pule ha katei ka skul, ki la ioh ban iashimbynta ha ki jait jingialehkai bad ki jingiakop bapher bapher bad ha kane ka sngi ba la pynkut ia katei ka lympung, la ioh bam sam khusnam sha baroh kito ki khynnah kiba la jop ha ki jingiakop ne ki jingialehkai bapher bapher.
Haba ai jingkren ha katei ka sngi, u Samla Toning Lapang, kum u Kongsan, u la ai ka jingiaroh kaba khraw eh ia ki nongpyniaid jong katei ka skul, kiba la lah ban pynlong ia katei ka lympung ialehkai Sports, namar lyngba jong kiba kum kitei ki lympung, ba ki khynnah ki lah ban pyni ia kata ka sap ka phong ba ki don ha ki kam ialehkai.
Ha kawei pat ka liang, utei nongialam ka KSU, u la kyntu ia kitei ki khynnah ba pule ha katei ka skul, ba nalor ba ki shimbynta ha ki jingialehkai bapher bapher, hynrei ki dei ruh ban shimkhia ne minit ha ki kam pule puthi.
