Nongpoh, Jylliew 5: Ka jingjur u lapbah ha kine ki 3 sngi ka la buh jingma ïa ki paidbah ha ka leit ka wan ha ka thain Tyrso ha Ri Bhoi, namar ka jingtwa khyndew ka la buh jingma ruh ïa ka jingkieng ïaid kali kaba la sdang ban twa lang hadien ba la don ka jingtwa khyndew kaba heh.
Kane ka jingkieng kaba la don jingma ban twa ka dei ha ki bynta jong ka Shnong Mawlasnai bad Umsaw Umdorbar ban leit sha ka Shnong Tyrso, Umtngam bad kiwei kiwei ki shnong.
Kumba la sakhi na ka jingwa khyndew, katei ka jingkieng ruh ka la jan twa bad ka la buh jingma ïa ki Kali paidbah ban ïaid ban ieng bad khamtam ki Kali heh, namar ka jinglong jingman ka Jingkieng ka la synjor na ka daw ka jingtwa khyndew kaba dei hadien ka jingther u lapbah ha kine ki lai sngi.
Na ka liang ka tnad PWD Bhoirymbong Division ki la leit ban jurip ban tohkit halor kane ka jinglong jingman bad la buh ruh ka jingmana ïa ki Kali paidbah ba ki hap ban husiar ha ka leit ka wan lyngba katei ka jingkieng.
Haba kren naka liang u bah Ksonbok Jeffry Diengdoh, JE PWD Road Bhoirymbong Sub Division, u la ïathuh ba Katei ka jingtwa khyndew ka dei kaba la jia haka 30 Jymmang hakaba ka jylla baroh kawei ka la mat ïa u lapbah uba jur uba la neh kumba 3 sngi tam bad dei lyngba utei u lapbah kaba la pynlong ïa katei ka jingtwa khyndew bad kaba la wan rah ruh ïaka jing syier mynsiem jong ki kali kiba leit ba wan khamtam ki kali heh kiba kit mar khia kiba hap ban ïaid lyngba katei ka jingkieng.
U la ïathuh ruh, mar ïa ioh jingtip ïa katei ka jingtwa khyndew naka liang jong ki mar mar ki la leit ban jurip bad phah ker daki dieng ki siej ban ai dak ïaki kali ba kin ïaid husiar lyngba katei ka jingkieng. U la ïathuh ruh kane ka dei ka sien ka baar kaba ki wan ban jurip ha ryngkat bad ki nongïalam shnong khnang ba kin ioh ban sdang ban pynbha noh ïa katei ka jingkieng bad namar ka jinglong jingman jong ka suiñ bneng kane ka jing pynbha ïa ka jingkieng kan bam por kumba shi bnai eiei.
U la kyntu ruh ïaki ba niah kali heh lane kino kino ki kali kit mar kiba khia ba kin kiar ban ïaid na kane ka surok katba kim pat lah ban maramot ha kajuh kapor u la kyntu ba kin pyndonkam ban ïaid da u surok naka shnong Nongrim Umpohwin ter ter ka ban mih sha Dawanki Farm bad ka ban ïa tyngkhung biang bad kane kajuh ka surok Mawlasnai Tyrso road.
Haba kren pat naka liang ki nongïalam shnong kiba kynthup ïa u bah Batskhem Sohtun, Rangbah Shnong Umshangktad bad u bah Bah Susngi Nongshong Shnong Umsaw Umdorbar ki la ai khublei ïa u MLA ka mawhati u Bah Charles Marngar uba la shim khia mardor ban phah ïaki ophisar ka tnad PWD ban jurip ïa katei ka jingtwa khyndew bad ban phah maramot noh kham kloi khnang ban ïada naki jingeh kiba lah ban wan hadien habud.
Kitei ki rangbah ki la kyntu ruh ïaki paidbah ba kin pynsngap ïa kane ka jingkyrpad ba kin phikir bha ïaka ïaid ka ïeng lyngba kane ka jingkieng bad ha kajuh kapor ki la kyntu ruh ïaki nongniah kali heh bad ki kali kit mar khia ba kin nym pat pyndonkam ban ïaid lyngba kane ka jingkieng.
