Shillong, Lber 16: Na ka daw ka jinglong jjingman kaba la ktah ia ka shongsuk ka shongsain ki paidbah ha Rilum Garo bad ba la mih ruh ka jingiakynad kaba jur hadpeng ki paid Garo bad ki bym dei ki riewlum halor ka jingpyrshah ki paidbah ban thep vote ne iakhun ha ka election GHADC ba la pynbeit ba long ha ka 10 tarik u Iaiong 2026 bad mynta ka sngi ka kynhun ki myntri sorkar ka jylla ki la shim kawei ka rai ban dang pynjlan biang ia ka election MDC ha GHADC.
Ia kane la iathuh da u Bah Prestone Tynsong uba dei u symbut myntri ka jylla bad u Myntri ba dei peit ia ka District Council Affairs haba kren sha ki lad pathai khubor mynta ka sngi hadieng ka jingiakynduh lang ka kynhun ki myntri ha Nongbah Shillong.
U la ong ruh ba ka sorkar lyngba ka rai jong ka kynhun ki Myntri sorkar ka la rai ban pynjlan sa 6 bnai na ka bynta ban pynlong ia ka election MDC ha GHADC bad kane ka jingpynjlan ia kane ka election ka dei ruh halor ka jinglong jingman bad ki jingiakynad kiba la mih ha rilum Garo.
U la iathuh ruh dei hadien ka jingiatai kaba la jlan por, ka kynhun ki myntri sorkar ka la shim ia ka rai ban pynjlan ia ka election MDC ha GHADC ka sdang naduh ka 18 tarik u ïaïong 2026 haduh ka 18 tarik u Risaw 2026.
Shuh shuh, u la iathuh ruh ba kane ka jingpynjlan ia ka por ban pynlong ia ka election MDC ha GHADC kaba la kot sha ka 6 bnai ka dei ba long ka jingkmen ia ki paidbah Garo, namar ka sorkar ka shim ia kane ka rai ban pynlan ka long na ka bynta ban wan rah biang ia ka shongsuk shongsain bad ruh kan don ka lynti ban ia kren halor kitei ki jingiakynad kiba la mih ha rilum Garo kaba dei na ka daw ka jingpyrshah ki paid Garoi ban shim bynta ki bym dei ki jaid bynriew riewlum ha ka election MDC ha GHADC, u la bynrap.
